“UBS” телевизийн захирал, хөгжмийн зохиолч, СГЗ Л.Балхжавынх хоёр хүүтэй. Хөвгүүдээ хүмүүжил сайтай, сайхан өсгөсөн нэрийг зүүдэг Л.Балхжавын гэргий хатагтай Ариунаа нэгэн цагт хэвлэлд ярилцлага өгөхдөө “Бэр сонгохдоо ар гэрээс нь илүү авъяас чадвар, халамж хайрыг нь харна” хэмээн ярьж байв.
Тэгвэл тэрээр өдгөө Ч.Сэлэнгэ, М.Цэрэндолгор гэх үеийнхэн дундаа сор болсон жүжигчин бүсгүйчүүдийг бэрээ болгожээ.
Түүний том бэр Ч.Сэлэнгэ багаасаа л жүжигчин болохыг мөрөөддөг байсан гэдэг. Үүнээсээ ч урваагүй. Өмнөд Солонгост хэсэг амьдарч, хожуу оюутан болсон ч 5 дахь Жульеттагаар сонгогдон, өөрийн авьяас чадвараа харуулсан хөдөлмөрч бүсгүй. Залуу жүжигчин Ч.Сэлэнгэ “UBS” телевизийн захирал, хөгжмийн зохиолч, СГЗ Л.Балхжавын хүү Б.Чингүүнтэй гэр бүл болж, хоёр ихэр хүү, охины ээж болсон. Амаржаад удаагүй мөртлөө уран бүтээлийн ажилдаа эргэн орж, олон бүтээлийн гол дүрд тоглосон. Ч.Сэлэнгэ өхөөрдөм царай, бяцхан биетэй ч гарамгүй их дайчин эмэгтэй. Өдгөө хайрт нөхөр найруулагч Б.Чингүүн охин хүү ихрүүд болох Есүгэн, Есүдэй хоёртойгоо АНУ-д ажиллаж амьдарч байна.
Бага бэр М.Цэрэндолгорын хувьд энэ цагийн залуу жүжигчдээс гоо үзэсгэлэн, боловсролоороо ялгардаг.
МУУГЗ Л.Балхжавын бага хүү Б.Билгүүний гэргий болсон тэрээр хүүхдээ төрүүлээд 7 хоноогүй байхдаа рекламны зураг авалтад оролцож, ойр дотныхноо гайхшруулж байв.
“Яг түүн шиг” шоуны оролцогч гэдгээр олонд танигдсан М.Цэрэндолгор нөхөртэйгөө 2015 оноос болзож эхэлсэн. Түүний нөхөр Б.Билгүүн нь АНУ-д боловсрол эзэмшсэн төдийгүй өдгөө Монгол Улсын Ерөнхийлөгчийн тамгын газарт ажилладаг. Тэрбээр 2016 онд “Оюутан цэрэг” хөтөлбөрт хамрагдан цэргийн алба хаасан.
Харин М.Цэрэндолгорыг, СТА жүжигчин Г.Ундармаагийн найруулсан “Тютю” уран сайхны киноны гол дүрд тоглосноор олон нийт мэднэ. Тэрбээр ОХУ-ын Москва хотын Театр урлагийн академид суралцан төгссөн. Монголын олон гоо сайхны брэнд бүтээгдэхүүний нүүр царай болсон М.Цэрэндолгор оюутан байхаасаа дэлхийн алдарт Louboutin World гоо сайхны бүтээгдэхүүний моделоор ажиллаж ирсэн.
