Монголын поп дива нарын нэг, МУСТА С.Наранг танихгүй хүн ховор. Хүчирхэг дуу хоолой, ягаан үс, хар нүдний шилийг имиж болгосон Хөвсгөл нутгийн дуучин бүсгүй сүүлийн үед бүжигчин болсон гэхэд хилсдэхгүй.
Муухан бүжигчнээс дээр гэгддэг тэрээр шинэ уран бүтээлдээ орж, хуучны уран бүтээлийн анд продюсер, ая зохиогч Халиунтай хамтран ажиллаж байгаа аж.
Дуучин бүсгүйн хувьд энэ жил 52 настай. Хөвсгөл аймгийн Мөрөн хотын хоёрдугаар 10 жилд аравдугаар анги хүртлээ суралцаж төгсөө, 1991 онд Кино драмын ангид элсэн суралцаж байжээ. Хүүхэд байхаасаа хөдөлгөөнтэй хүүхэд байсан гэгддэг тэрээр олон нийтийн ажилд идэвхтэй, дуулж хуурддаг, анги хамт олноо, найз нөхдөө олон нийтийн ажилд их уриалдаг хүүхэд байжээ.
Түүний аав Хөвсгөлийн модны үйлдвэрийн дарга хийж байсан бөгөөд ой хамгаалах, модны үйлдвэрийн ажилчдыг удирдах ажлыг олон жил хийжээ. Харин ээж нь тогооч эмэгтэй байсан гэдэг. Тэрээр ээжийнхээ тухай дурсахдаа “Миний ээж сайхан сэтгэлтэй үр хүүхдийнхээ талаар мятрашгүй тэмцэгч, дайчин, ухаантай эмэгтэй байсан юм. Хэр барагтай бол биднийг загнаад байхгүй ч нэг загнахдаа ширүүн бууна шүү. Биднийг маш цэвэрч байлгаж сургасан. Хоёр эрэгтэй, хоёр эмэгтэй хүүхэдтэй айлын гуравдахь хүүхэд. Доороо нэг дүүтэй. Хөвсгөлд одоо аавын маань ах дүү, миний төрсөн ах амьдарч байна. Би нутаг усныхандаа хайртай. Тэнд амьдарч буй бүх хүнийг хайрладаг. Хөвсгөл гэдэг нэрээр овоглож яваа хэн бүхэн сайн нэртэй, сайхан амьдраасай гэж хүсдэг. Хөвсгөлийн мангар гэж хэлүүлэх дургүй. Хөвсгөлийнхөн ухаантай юм гэж хэлүүлэх дуртай. Бид заавал нэг зүйлээрээ илүү байх ёстой шүү. Нэг зүйлийн төлөө тууштай явж, нутгийн энергиэ сайнаар ашиглах хэрэгтэй” хэмээн хэвлэлд ярьж байв.
