Шинэ хичээлийн жил эхэлж буйтай холбогдуулан орон нутгийн эцэг эхчүүд оюутан болсон хүүхдээ аятай тухтай байлгахыг хичээж, түрээсийн байрны эрэлд гардаг. Гэтэл үүнд нь тулгуурлан залилан мэхлэх гэмт хэрэг үйлддэг этгээдүүд борооны дараах мөөг шиг олширчээ.
Хэдхэн хоногийн өмнө орон нутгийн нэгэн ээж охиндоо байр хөлслөх гэж яваад хоёр сая төгрөг залилуулж, “дээшээ тэнгэр хол доошоо газар хатуу” хэцүүхэн яваагаа хэвлэлд ярьсан байдаг.
Тэгвэл Дундговь аймгийн Эрдэнэдалай сумын харьяат, үндэсний бөхийн улсын начин Э.Даш өөрийн цахим хуудаснаа сэтгэл нь эмзэглэсэн талаар дурьдаж, тэр ээжид өргөө цагаан гэр авч өгөх гэж байгаагаа дурьдаж, хандив цуглуулжээ.
Тэрээр “Өвлийн хүйтнээр цэцэг шиг охидоо дулаан байранд өвөлжүүлэх ээжийн сэтгэлийг бодолгүй залилан хийж амьдарч яваа залууд хэлэх үг олдохгүй юм. Хүйтний улирал дөхөж байгаа учир энэ эгчид яаж туслах вэ миний зүгээс “Өргөө цагаан гэр” авч өгвөл зүгээр юм уу гэж бодож байна. Нүүр номын найзууд минь ямар саналтай байна санаа бодлоо хуваалцаж сэтгэлийн дэм хайрлахыг уриалж байна” гэсэн байна.
