“Мөнгөтэй зочин”-гийн Б.Баяр

Одоогоос 20 гаруй жилийн өмнөөс танин мэдэхүйн “Тататунгаа”, “Дэлгэцийн бурхад”, “Шагайн цаг”, “Мэлмий найраг”, “АХА” зэрэг 13 нэвтрүүлгийн зохиогчоор ажиллаж өдгөө “Мөнгөтэй зочин” нэвтрүүлгийн хөтлөгч болсон найруулагч Б.Баяр энд явна. Монголын үүх түүх, өв уламжлалыг хүүхэд залууст таниулах, өвлүүлэхэд гол үүрэг гүйцэтгэж яваа тэрбээр дээрх нэвтрүүлгүүдээс гадна хэд хэдэн кино хийж олон улсын наадмуудаас шагнал хүртэж явсан авьяаслаг уран бүтээлч юм.
Тухайлбал, тэрбээр Япон улсад болсон Азийн кино наадмын тэргүүн байрын шагналт “Усчин”/1997 он/, ОХУ-д болсон кино наадмын шагналт “Бат Варшав хоёр”/1998 он/ болон “Бүүвэйн дуу”/2000 он/, “Тэнгэрийн нүүдэл”/2001 он/, “Төлчин”/2002 он/, “Ганбат”/2007 он/, “Зууныг эзэлсэн шонхор”/2008 он. Монгол Улсын баатар Гунгаа генерал/, “Зөвхөн намайг үхсэний дараа”/2001 он. Барон Унгерн/, “Сар анх мандсан нутаг”/2011 он. Сүг зураг/, “Миний амьдралын аз жаргал, уйтгар гуниг”/2011 он. Ардын жүжигчин Л.Жамсранжав/, “Би Монгол хүн”/2012/зэрэг баримтат кино бүтээжээ. Мөн түүний урын санд “Гурван долоо хоног”/1999 он/ бүрэн хэмжээний кино, “Үрэгдсэнийг хүлээгч”/2001 он”, “Бурхан богд аав бид хоёр” /2002 он/ зэрэг богино хэмжээний кино бий.