Өнгөрсөн амралтын өдрүүдэд Сүхбаатарын талбайд Үндэсний номын өдрүүд болж, түм түжигнэн бум бужигнасан. Энэ үеэр өөрсдийн оюуны бүтээлээ уншигчдад өөрийн гараар өргөн барьсан ахмад үеийн цөөн зохиолчдын нэг нь Ардын зохиолч П.Бадарч байв.
Өдгөө 83 настай тэрбээр бие тэнхээ тэнхлүүн, оюун ухаан нь саруул сайхан байсныг онцлох нь зүйтэй болов уу.
Ардын уран зохиолч, соёлын гавьяат зүтгэлтэн Пунцагийн Бадарч гуай хэнтэй чуулсан энгийн, нээлттэй, байгаагаараа л байдаг нэгэн. Тэрбээр Ямар ч яриаг хачин сайхан “амттай” болтол нь хошигнож чаддаг зантай.
Нэгэн сэтгүүлчийн “Та үхлээс айдаг уу” гэх асуултад “Ертөнцийн хуулийг ямар ч хүн сайн мэдрэх хэрэгтэй. Сэтгэл, сэтгэлгээгээ хөгжүүлсэн хүнд бол үхэл хүртэл айгаад байх зүйл биш. “Үхлийн тухай өдөр болгон боддог хүн асар ихийг хийж бүтээдэг” гэж Фалес хэлсэн. Өдий насанд үхлээс юунд нь айх вэ. Буурал Бадарч битгий хэл, бурхан багш хүртэл үхдэг орчлон шүү дээ. Яршиг л байна” хэмээн хээв нэг хариулж явсан эрхэм юм.
