Номтойгоо эгэлгүй ижилхэн гэгддэг зохиолч Г.Соёлгэрэл

Сүүлийн үед уншигчдыг байлдан дагуулж буй зохиолч Г.Соёлгэрэлийг манай папараци дуран онцолж байна. Үеийнхнээсээ нэлээн хожуу уран бүтээлээ туурвиж эхэлсэн тэрээр “Оройхон гараад ширүүхэн дайрах”-ын үлгэрээр энэ талбарт хүч түрэн орж ирсэн гэхэд болно. “Дурласан эмэгтэй хамгийн хөөрхөн” өгүүллэгийн номоо 2016 онд олны хүртээл болгосон зохиолч бүсгүй маань 2017 онд “Сахиусан тэнгэрийн нулимс”, “Гаслант усан дусал” адал явдалт туужууд, 2018 онд “Тэргүүн хатагтай” романы нэгдүгээр боть, “Эрвээхэй дэвсэн зун” өгүүллэгийн ном, “Айкугийн илбэ”, “Нисдэг Айку” хүүхдийн цуврал ном, 2019 онд “Өстний өвөрт”, 2020 онд “Рэкет” адал явдалт роман, 2021 онд “Хормогчоо тайлж Хорвоотой танилц” хувь хүний хөгжлийн номоороо уншигчдыг байлдан дагуулаад байгаа юм.
Түүний зохиолууд “Өстний өвөрт”, “Гаслант усан дусал”, “Сахиусан тэнгэрийн нулимс” гээд сонин содон нэртэй. Тиймдээ ч эрхэм зохиолчийн найзууд нь “Чи зохиол шигээ сонин этгээд хүн” гэж түүнд хэлдэг гэнэ лээ. Түүний ааш ааль, зан чанар, хувцаслалт гээд л бүгд номноос мэдрэгддэг гэдгийг ойр дотныхон нь өгүүлдэг. Уншигчид ч түүний “Хормогчоо тайлж, хорвоотой танилц”, “Дурласан эмэгтэй хамгийн хөөрхөн” гээд энгийн хэрнээ содон нэрнүүдтэй гэдгийг нь хүлээн зөвшөөрдөг.