Дотоод сэтгэлийн амгаланд хүрсэн бясалгагч Д.Гантөгс манай дуранд

Дотоод сэтгэлийн амар амгалангийн талаар монголчуудад таниулсан “Амьдрах урлаг” бясалгалын багш, сэтгэл судлалын доктор Д.Гантөгс өдгөө улс төрд зүтгэж МАН-ын эмэгтэйчүүдийн холбооны гишүүний нэг болсон. Уур уцаарыг хэрхэн даван туулах, сэтгэлийн амар амгаланд хүрэх талаар байнга зөвлөдөг тэрбээр өнгөрсөн 2020 оны УИХ-ын сонгуулиар Төв аймагт нэрээ дэвшүүлсэн ч тусыг эс олсон билээ.
Тэгвэл түүнийг манай папараци дуран онцлон буулгалаа. Бясалгагч бүсгүйн хувьд монголчуудын сэтгэл судлалыг багагүй судалж, доктор цолтой болсон нэгэн.
Тэрбээр монголчуудын сэтгэлзүйг талаар ярихдаа “Манай монголчууд харьцангуй өргөн уудам газар нутагтай, сэтгэлийн цар хүрээний баялаг ихтэй, оюуны чадавхи өндөртэй хүмүүс. Сэтгэлийн тавгүй байдлыг хүн өөрөө бий болгодог. Нэгэндээ атаархах, бусдадаа буруугаа чихэх, бэлэнчлэх сэтгэлгээтэй болсноос сэтгэлийн хямралд ордог. Сайхан юм ярьсан ч заавал өөг нь хайж, буруу тийш нь хазайлгаж ойлгодог. Тиймээс хүний амьдралын мөн чанар нь юу юм гэдгийг ойлгох хэрэгтэй. Бид өнөөдөр материаллаг байдлыг бий болгож чадаж байна. Гэвч энэ бол бидний амьдралын мөн чанар биш. Бид хэчнээн эд хөрөнгөтэй байлаа гээд амьдралын төгсгөлд ганцаараа буцдаг шүү дээ. Хүн болгон өөрийнхөө өмнө хариуцлагатай эзэн нь байх зарчим дээр өөрийгөө хөгжүүлэх шаардлагатай юм” гэж байжээ.