“Нүүрсний” гэх хэрэгт яллагдагчаар татагдсан “Эрдэнэс Тавантолгой” ХК-ийн гүйцэтгэх захирал асан Б.Ганхуяг нарын 11 хүний гэм бурууг дэнслэх хурал өнөөдөр (2023.10.30) болсон.
Энэ үеэр Б.Ганхуяг “Есдүгээр сараас хойш миний бие сайнгүй байна. Тууралт маань ясандаа хүрэх гээд байх шиг байна. Зураг аваад, баримт болгоод өгөөч” гэж 461 дүгээр хорих ангийнханд хүсэлт тавьсан ч авч өгдөггүй юм билээ” хэмээж байсан.
Мөн түүний ар гэрийнхэн ч “Б.Ганхуягийг хордуулсан байж болзошгүй” гэж мэдэгдээд буй билээ. Б.Ганхуягийн биеийн байдлын талаар ШШГЕГ-ынхнаас тодруулахад “Хоригдогч Б.Ганхуяг 2022 оны арванхоёрдугаар сарын 7-нд Цагдан хорих 461 дүгээр ангид хоригдсон. Түүнийг анх хүлээн авах үеийн эмчийн үзлэгээр хоёр хөлийн шилбээр хуучин шарх, сорвижилт, шархлаатай, маажсан сорвитой байсан. 
Хэвлэл мэдээллийн хэрэгслээр олон нийтэд хүргэж буй зурагт нийтлэгдсэн хөлийн шилбэн дээрх өөрчлөлт нь цагдан хоригдохоор ирэх үеийн байдлаас нэмэгдээгүй, шинээр гарсан тууралт, үрэвсэлгүй, хуучин сорвижилттой байна. Б.Ганхуяг нь хоригдсоноосоо хойших хугацаанд эмчийн хяналтад байсан бөгөөд тус ангийн Нэгдсэн эмнэлэгт удаа дараа хэвтэн эмчлүүлсэн. Хамгийн сүүлд 2023 оны есдүгээр сарын 26-нд түүнийг биохими, дархлал судлал, цусны болон шээсний ерөнхий, цээжний зураг, хэвлийн ЭХО шинжилгээнд хамруулж, Цагдан хорих 461 дүгээр ангийн эмнэлэгт 14 хоног хэвтүүлэн эмчилж, эмнэлгийн тусламж үзүүлсэн.
Хоригдогч Б.Ганхуягийн эрүүл мэндийн байдал одоогоор тогтвортой байна” гэсэн юм.
