УИХ-ын гишүүн Ч.Ундрам гэртээ охиноо загнаж, зодож буй бичлэгийг нөхөр Б.Наранцацралт нь дэлгэснээр тэдний гэр бүл салж байгааг олон нийт мэдсэн. Харин гэр бүлийн хүчирхийлэл бүхий бичлэгийг дэлгэсэн Б.Наранцацралт Эрүүгийн хуулийн 13.11 дүгээр зүйл.Хувь хүний нууцыг задруулсан гэсэн зүйл ангиар 15 сая төгрөгөөр торгуулаад өнгөрсөн.
Тэгвэл Ч.Ундрам болон түүний нөхөр асан Б.Наранцацралт нарын маргаан дуусаагүй бололтой. Асуудал олны нүднээс нууцаар цагдаа, шүүх болж гэр бүлийн булайгаа дэлгэх эсэх дээрээ тулжээ. Тодруулбал,
Ч.Ундрамын экс нөхөр Б.Наранцацралт нь хадам аавынхаа компанид ажиллаж байхдаа төрсөн эгчдээ давуу байдал үүсгэсэн, байр, машин, бэлэн мөнгө өгсөн гэх зэргээр 6.5 тэрбум төгрөгийн хохирол учруулсан гэх гэмт хэрэгт буруутган Эрүүгийн хуулийн 22.12 дугаар зүйл.Хуулийн этгээдийн эрх мэдлийг урвуулан ашиглах гэсэн зүйл ангиар яллах дүгнэлт үйлдүүлжээ.
Анхан болон давж заалдах шатны шүүх хурал болж хэргийг мөрдөн байцаалтад буцаахаар болсон бөгөөд “хэргийн эзэн” Б.Наранцацралт элгээ эвхэн шүүх танхимд сууж байхад, Ч.Ундрам сүүдрээ ч шүүх танхимд үзүүлсэнгүй.
Б.Наранцацралтын хувьд гэм буруугүй, экс хадам аав нь хэрэгт унагаж, өөртөө ашигтай давуу байдал бий болгож байна хэмээн мэдүүлж байгаа юм.
Бид энэ хэргийн талаар мэдээлсээр байх болно.
