Монголын хөгжмийн ертөнцөд 14 жил тасралтгүй уран бүтээлээ гаргаж аав ээж, эх орон, хайр дурлалыг магтан дуулсан хамтлаг бол “Гурван бүдүүн” юм. “Ижийгээ гомдоох учиргүй , “Цуг алхъя”, “Гучин наймтай аав”, “Холын чи минь” гэх мэт дуунууд нь тухайн үедээ хит парадуудыг тэргүүлж, хүн болгон мэдэх болсон жинхэнэ хит дуунуудын эзэд бол тэд юм.
“Гурван бүдүүн” хамтлагийн аялгуу хөг, утга чимэг нь Аажимын Мөнгөншагай байлаа. Тэрээр чадварлаг дуучин төдийгүй гайхалтай хөгжмийн зохиолч байв. Түүнийг хамтлагийнхаа дуунуудын хөгжмийг зохиодгоор нь мэддэг байсан бол одоо түүний дууг дуучин болгон дуулдаг болсон гэхэд хилсдэхгүй болжээ. Энэ нь түүний авъяаслаг хөгжмийн зохиолч гэдгийг батлаж буй хэрэг юм.
Түүний аялгууг нь зохиосон МЗЭ-ийн гишүүн, Г.Сэр-Одын нэрэмжит шагналт, СТА, Яруу найрагч Я.Отгонбаярын шүлэг “Гуч хүрсэн бүсгүй”, “Дэрвэгэр сормууст”, “Бид нэг ангийнхан” зэрэг, Яруу найрагч Ч.Нандинцэцэгийн шүлэг “Дурлал гоо бүсгүй”, МУСГЗ Ш.Гүрбазарын шүлэг “Донжтой бүсгүй” зэрэг олон уран бүтээлүүдийг нь монголын ард түмэн мэддэг болсон.
Хамгийн харамсалтай нь ид хийж бүтээх насан дээрээ гялалзаж явсан тэрээр 2019 оны 09-р сарын 07-ны өдөр зуурдаар таалал төгсч 2019 оны 09-р сарын 16-ны өдөр СТӨ-нөөс сүүлийн замд үдсэн. Түүнгүйгээр Гурван бүдүүн хамтлагийг, монголын рок поп урлагийг төсөөлөхийн аргагүй. Нэгэн авъяастан тэнгэртээ заларч дуунд дуртай монголын ард түмэн түүний төлөө харамсан гашуудаж, дурсан санаж өдийг хүрсэн билээ.
Түүний дурсгалд зориулж “Гурван бүдүүн” хамтлаг, уран бүтээлчид нөхөд нь “Гуч хүрсэн бүсгүй” дурсамж, хүндэтгэлийн тоглолтыг UB Palace-н концертын их танхимд зохион байгуулсан.
Уг тоглолтод сайн дураараа олон арван уран бүтээлчид хүрэлцэн ирж, ая дуугаа өргөсөн байдаг. А.Мөнгөншагай агсан Монгол орныхоо 21 аймгаар тойрч, “30 хүрсэн бүсгүй” тоглолтоо зохион байгуулаад хамгийн сүүлд Улаанбаатар хотдоо тоглохоор төлөвлөн, хөдөө орон нутгаар тоглолтоо хийж явахдаа харамсалтайгаар амь насаа алдсан. Иймд түүний буяны 49 хоногт нь багтааж хүслийг гүйцээх зорилгоор тус тоглолтыг зохион байгуулсан байдаг. “Гурван бүдүүн” хамтлагийн гишүүд тус тоглолтын орлого болох 50 сая төгрөгөөр талийгаачийн хоёр хүүхдэд хадгаламж нээсэн тухайгаа дуулгаж А.Мөнгөншагай агсны гэр бүлд нь хүлээлгэн өгсөн.
Шинэ жилийн баяраар хамтлаг дуучид өөрийн уран бүтээлүүдийг толиулж бидний баяр дээр баяр нэмдэг. Хэрвээ энэ эрхэм бидний дунд байсан бол дуу хуураараа бидний баярыг хуваалцаж, хөгжөөж яваадаа гэж бодон яг энэ л үед түүнийг дурсахыг хүслээ. Бид дурсах үүргээ хэзээ ч мартаж болохгүй билээ. Түүний хийж бүтээсэн олон сайхан уран бүтээл үүрд мөнхрөн үлдэж эгшиглэсээр байгаа билээ.
https://youtu.be/VMDpHFfthsg
