Энд харагдаж буй гавъяат жүжигчид бол Монголд хошин урлагийг анхлан үүсгэн байгуулагчдын нэг яахын аргагүй мөн. Урлагийн тайзнаа 20 гаруй жил зүтгэсэн тэд өдгөө өөр өөрсдийн продакшинтай болж, өөр өөрсдийн замналаар яваа.
Тэд 1994 оны үед анха “Өнгөт инээд” хамтлагт анхлан зүтгэж байсан бөгөөд анхны бүрэлдэхүүнд Н.Онон, С.Өлзийхүү, И.Одончимэг нар байжээ. Тэдний араас Л.Дэмидбаатар агсан, Д.Хүрэлхүү нар орж ирсэн тоглож байсан гэдэг.
Энэ талаар С.Өлзийхүү гавьяат “Тэр үед олон хошин шогийн хамтлаг байсангүй. Монголын хошин урлагийн театрыг Батзаяа ах маань ахалдаг байсан. Дараа нь манай “Өнгөт инээд” байсан юм. Бид хэд тоглолтдоо орчихоод л театрынхаа тоглолтод ордог байлаа. Тэр үед чинь хошин шогийн тоглолт долоо наймхан хоног л тоглодог байсан л даа. “Өнгөт инээд” хамтлагт маш олон сайхан жүжигчид байсан. Түүнчлэн олон сайхан жүжигчин энэ хамтлагаас уран бүтээлээ туурвиж гарсан байдаг. Өнгөт инээд хамтлагт ороогүй жүжигчид ховор доо. Босго сайтай газар байсан гэж боддог. Олон ч телевизийн нэвтрүүлэг хийж байлаа. Дан ганц жүжигчид гэхээс найруулагч, менежерүүд төрөн гарсан байдаг” хэмээн ярьсан байдаг.
