ТЕГ-ын дарга асан Б.Хурцын гэргий Ү.Сарнай хэзээнээс “Сарнайх” салон, “Pekaso” брэндээрээ олонд танигдсан нэгэн. Байгалийн гоо үзэмжийг эрхэмлэдэг тэрээр Ардын зураач Ү.Ядамсүрэнгийн удмын охин.
Энэ цагийн сэхээтнүүдийн тоонд зүй ёсоор багтдаг тэрээр өнгөрсөн амралтын өдөр нисдэг тэргээр монголын үзэсгэлэнт газруудаар аялж байгаагаа нийтлэсэн байдаг. Ингэж явахдаа тэрээр алтны компаниудаас болж байгалийн үзэмжээрээ сүйтгэгдсэн газруудыг олонд дэлгэж, алтны компаниудыг хариуцлагатай байхыг сануулжээ.
Тэрээр “Алтыг нь авсан бол нөхөн сэргээлт хийх ёстой. Бүр арай л хариуцлаггүй үйлдэл.Өвөрхангай аймгийн Бат-Өлзийт, Архангай аймгийн Цэнхэр сумын нутгийн байгаль, Хангайн нурууны амуудыг алтны компаниуд хэрхэн ашиглаад нөхөн сэргээлт хийхгүй орхисон, овоолгоос Орхон гол шараар урсаж байна. Энэ нутагт олборлолт хийж байсан компаниуд нөхөн сэргээлт огт хийлгүй алтыг нь аваад хаяад явсныг зургаас харж болно. Хариуцлагатай уул уурхай гэж хоосон яриа болохыг Уул уурхайн яам анхааралдаа аваасай. Байгаль орчны яам гэж үнэндээ байгалиа хамгаалж чадахгүй байна.
Хулгайч луйварчид л баялагт чинь эзэн болж баяжаад ийм л байгалийг хойч үед чинь үлдээж байна. Байгаль орчныг сүйтгэсэн хүмүүст зориулсан хууль байна уу. Ингээд сүйтгүүлээд дуусах уу?” гэжээ.
