“Хүн бүхэнд цэвэр агаар, Мод бүхэнд ус” уриатай хаврын мод тарилтын нээлтийн үйл ажиллагаа өнөөдөр Үндэсний цэцэрлэгт хүрээлэнд боллоо. Нээлтийн үйл ажиллагаанд Монгол Улсын Ерөнхий сайд У.Хүрэлсүх, нийслэлийн Засаг дарга бөгөөд Улаанбаатар хотын захирагч С.Батболд, нийслэлийн Засаг даргын орлогч Ж.Батбаясгалан, нийслэлийн Засаг даргын орлогч Д.Энхтөр болон бусад албаны төлөөллүүд, 40 гаруй байгууллагын ажилтан албан хаагчид, нийслэлийн иргэд оролцлоо.
Нийслэлийн Засаг дарга бөгөөд Улаанбаатар хотын захирагч С.Батболд нээлтийн үеэр хэлсэн үгэндээ “Өнөөдөр нийслэлийн төр захиргааны байгууллагынхан, хувийн хэвшлийнхэн, сургууль, цэцэрлэгийн хүүхдүүд, иргэд мод тарих өдөрлөгт хүрэлцэн ирсэнд талархсанаа илэрхийлье. Улаанбаатар хот ногоон хот болох зорилт дэшүүлсэн. Энэ зорилтын хүрээнд хотын зүгээс Үндэсний цэцэрлэгт хүрээлэнг тохижуулахаас гадна бүх дүүргүүдэд бичил цэцэрлэгт хүрээлэн байгуулахаар төлөвлөсөн байгаа. Модоо зөвхөн тарихаас гадна түүнийгээ арчлах, ургуулах ёстой. Улаанбаатар хотоо ногоон хот болгоход хүн бүрийн оролцоо чухал юм. Тийм учраас зөвхөн ганц өдөр бус хавар намрын тариалалтад бүгд идэвхтэй оролцохыг уриалж байна” хэмээн онцлов.
МУ-ын Ерөнхий сайд У.Хүрэлсүх “Мод тарина гэдэг бол маш их буянтай ажил. Үр хойчдоо өв үлдээж байна гэж ойлгож болно. Хүн бүр байгал дэлхийгээ хайрлаж, хамгаалж үр хүүхэдлээ ногоон дэлхийгээ байгаа чигээр нь өвлүүлэн үлдээх учиртай юм. Бид мод тарьж байгаа нь өөрсдөдөө болон үр хүүхэддээ үлдээж буй хамгийн том бэлэг юм. Сүүлийн жилүүдэд мод тарих хөдөлгөөн өрнүүлж, сургууль, хамт олон, албан байгууллагаараа оролцож байгаад баяртай байна. Өнөөдрийн арга хэмжээнд оролцож байгаа бүх хүмүүстээ чин сэтгэлээсээ баярлалаа гэж хэлье” хэмээлээ.
Мөн Монгол Улсын их хурлын тамгын газар, Ерөнхийлөгчийн тамгын газар, Нийслэлийн Засаг даргын тамгын газар, С1 телевиз, Дулааны III цахилгаан станц ТӨХК, “Орчлон” дунд сургууль, Улаанбаатар бүрэн дунд сургууль, “Моннис” групп, Монгол банк, Монгол Улсын Хөгжлийн банк, Олон улсын энэрлийн байгууллага хамт олон оролцож ногоон байгууламжийг нэмэгдүүлэхэд бодит хувь нэмэр орууллаа. Мөн өмнөх жилүүдэд Үндэсний цэцэрлэгт хүрээлэнгийн талбайд мод тарьсан иргэд, байгууллагууд тарьсан модондоо арчилгаа, усалгаа хийж оролцов.
Энэ жилийн хаврын мод тарилтаар хайлаас, чацаргана, монос, голт бор, улиас, гацуур, нарс, шар хуайс гэсэн 8 төрлийн нийт 5000 орчим мод таригдах юм. Үндэсний цэцэрлэгт хүрээлэн Маршалын гүүрний зүүн хойд хэсгээс Баянзүрхийн гүүр хүртэлх 973 га талбайг хамарч байгаагаас 183 га талбайн ТЭЗҮ хийгдсэн байна. Өнгөрсөн жилээс III ээлжийн 50 га талбайд ногоон байгууламж тохижтилтын ажил эхэлсэн бөгөөд энэ жилийн мод тарилт Ус сувгийн удирдах газрын гүний худгийг хамгаалах хамгаалалтын зурвас хэлбэрээр таригдаж байна.
2009 оноос хойш Үндэсний цэцэрлэгт хүрээлэнгийн талбайд нийт 27 төрлийн 123 мянга гаруй мод сөөг таригдсан. Өнгөрсөн 2017 онд тооллого явуулж мод ургалтын байдлыг тодорхойлоход 98.8 хувьтай гэсэн үзүүлэлт гараад байна.
“Үндэсний цэцэрлэгт хүрээлэн” ОНӨТҮГ нийслэлийн ногоон байгууламжийн массыг нэмэгдүүлэх, эрүүл эко орчныг бүрдүүлэх зорилтын хүрээнд жил бүрийн тав, аравдугаар сард “Бүх нийтээр мод тарих үндэсний өдөр”-ийг албан байгууллага аж ахуйн нэгж, иргэдийг оролцуулан, зохион байгуулсаар байгаа юм.
“Үндэсний цэцэрлэгт хүрээлэн” ОНӨТҮГ-ын дарга С.Эрдэнэтуул “Үндэсний цэцэрлэгт хүрээлэнгийн нэгдүгээрт эрэмбэлэгдэх зорилго бол нийслэлчүүдийн ундны усны эх үүсвэрийг хамгаалах. Үүний тулд бид ногоон байгууламжаа нэмэгдүүлэхэд анхаарч, жил бүрийн хавар, намрын мод тарилтаар ундны усны зурвас дагуу шинэ тарилтыг төлөвлөн мод тарьж байна” хэмээв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
