Хэдхэн хоногийн дараа Дэлхийн циркчид Монголд ирнэ. Тэд монгол хүүхэд багачуудад үзүүлбэрээ үзүүлэхийн тулд Буянт-Ухаа цогцолборт тоглолтоо хийхээр болсон билээ.
Спортын зориулалттай энэхүү талбайгаас хүүхэд багачууд циркийн гайхамшиг, дүрс дуугаралтыг хүлээж авах нь юу л бол. Гэвч ганц аж ахуйн нэгжийн асуудлыг шийдэж чаддаггүй Соёлын яамтай манайх шиг улсад үүнээс өөр сонголт үгүй.
Асашёорюү аварга Д.Дагвадорж 2008 онд Улсын циркийн барилгыг менежментийн хувьчлалаар авахдаа үйл ажиллагааны чиглэлийг өөрчлөхгүй гэж гэрээ хийсэн байдаг. Гэтэл өнгөрсөн 2020 оноос улсын циркийн барилгын засвар, шинэчлэл хийх нэрийдлээр буулгаж, өнөөг бахь байдгаараа байгаасаар буй. Бүхэл бүтэн улсын Соёлын яамыг удирдаж яваа, “тэрбумтан” сайд Ч.Номин энэ асуудалд байр сууриа илэрхийлэхдээ “Аса” групптэй хийсэн гэрээгээр ч авч явна гэсэн чиг үүрэгтэй байгаа юм. Тэгэхээр Монгол Улсын Соёлын яамны хувьд цаашид циркийг үйл ажиллагааны хувьд циркийн чиглэлээр нь авч явах ёстой гэдэг дээр хатуу байр суурьтай байгаа” гэхээс өөр тайлбар өгөөгүй.
Улсынхаа циркийн хөгжил, соёлд анхаардаг, төрийн төлөө сэтгэлтэй хүн Соёлын сайдаар суусан бол өдийд энэ асуудлыг аль хэдийнэ нэг тийш шийдчихсэн сууж байх байв. Харин Ч.Номин сайд та юу хийж байна вэ?
Дээрх асуудалтай холбоотойгоор манай редакциас Соёлын яамны хэвлэлийн албатай холбогдож, тодруулахад “Аса циркэд удаа дараа албан бичиг явуулсан. Бид циркийн үйл ажиллагааны чиглэлийг өөрчлөхгүй явах байр сууриа илэрхийлж байгаа. Гэвч бодит байдал дээрдэхгүй байгаа. Цирктэй холбоотой бусад асуудлыг манай яамны Сэргэлэн даргаас тодруулна уу” гэхээс өөр тайлбар өгсөнгүй.
Гэвч тайлбар өгөх үүрэг хүлээсэн “хурган дарга” Сэргэлэн нь “Хуралтай байна. Үдээс хойш холбогдо” гэж хэлээд ажлын цагаар утсаа салгаад алга болгох нь тэр…
Ямартаа ч, хэвлэлээр цэцэрхэж суудаг Ч.Номин сайдын эргэн тойрны албан хаагчид ингэж ажлаа хийдэг бололтой. Тэр тусмаа цирк тойрсон асуудлыг хөндөхөөр “зугатаах” болсон нь гайхалтай.
