Хөл бөмбөгийн ногоон талбайн амьд домгуудын нэг Их Британийн од Дэвид Бекхэм 71 сая гаруй дагагчтай өөрийн инстаграм хуудсыг нэг өдөр хөтлөх эрхийг Украины эмчид олгожээ.
Ингэснээр тус улсад дайны нөхцөл байдал ямар байгааг, иргэдийн эрүүл мэнд, амь нас, эмч, эмнэлэгийн ажилтнуудын нөхцөл байдлын талаар бүтэн өдрийн турш Харьков хотын эмнэлэгээс шууд мэдээллээ.
Давид Бэкхэм 2005 оноос хойш НҮБ-ын Хүүхдийн сангийн сайн санааны элчээр ажиллаж байгаа юм. Түүний инста хуудсаар Украины Харьков хот дахь дайны нөхцөл байдлын талаар ярьсан эмч Ирина: эмнэлэгийн ажилчид 7 хоногийн турш 24 цагаар тасралтгүй ажиллаж байгаа ч бид хүлээсэн үүргээ биелүүлж байна. Дайны эхний өдөр бүх жирэмсэн эмэгтэйчүүд, эхчүүдийг хонгилд нүүлгэн шилжүүлсэн. Бид хамтдаа гурван цагийг аймшигтай өнгөрүүлсэн. Харамсалтай нь бид эрчимт эмчилгээнд байгаа хүүхдүүдийг хонгилд аваачих боломжгүй. Хүчилтөрөгчид суурилсан аврах төхөөрөмж хонгилд байхгүй гэжээ.
Ирина нэрээрээ танил болоод байгаа тэрээр дайны энэ цаг үед эмч нар эмнэлэгийн тусламжийн бүх үүргийг гүйцэтгэж байгааг онцолсон байна. Одоогийн байдлаар Ирина өөрөө тус төвийн дарга төдийгүй хүүхдийн мэдээгүйжүүлэгч эмчээр ажиллаж, ачаа буулгаж, ложистикийн чиглэлээр ажиллаж, өвчтөнүүдэд сэтгэл санааны дэмжлэг үзүүлэн ажиллаж буйгаа хэлжээ. Түүний илгээсэн дайнд нэрвэгдсэн иргэд, өвчтөнүүдийн зураг, дүрс бичлэг алдарт од Дэвид Бэкхэмийн инстаграм хуудсаар дамжин олон нийтэд хүрээд байна.
Дэвид Бекхэм НҮБ-ын хүүхдийн эрх, хүний эрхийн чиглэлээр үйл ажиллагаа явуулдаг 7 сангаар дамжуулан дайнд нэрвэгдсэн тус улсад яаралтай тусламж үзүүлэхийг уриаллаа. Мөн тэрээр өөрийн гэр бүлийн зүгээс дайнд нэрвэгдэгсдэд хандив өгсөн байна.
