Хувийн телевизээрээ төрийн ажлыг төсвийн мөнгөөр хийдэг, танил талаа давуу эрх гарган шагнадаг гэх зэрэг “мэдрэмжгүй” ажлууд яваа хүн бол Соёлын сайд Ч.Номин. Баян айлын охин гэгддэг түүний өмнөх дуулиан тасраагүй байхад түүнд хаягласан гомдлууд сошиал хуудаснаа хөврөх болов. 
Тэрбээр өөрийн улс үндэсний нэрийг дэлхийд гаргаж яваа залуу авьяаслаг залуу уран бүтээлчдээ дэмжиж туслах нь бүү хэл, авьяас чадварыг нь үнэлж байгаагүй ажээ.
Тухайлбал, удахгүй Итали улсын Тревисо хотод зохион байгуулагдах 14 дэх удаагийн олон улсын төгөлдөр хуурчдын уралдаанд эх орноо төлөөлөн оролцох Хил хамгаалах байгууллагын 0224 дүгээр ангийн дуу бүжгийн чуулгын залуу уран бүтээлч Ч.Есөнхандыг дэмжиж туслахгүйгээр барахгүй, огт тоон хэлэлцэхгүй байгаа аж.
Ч.Есөнхандын хувьд ОХУ-ын Москва хот дахь П.И. Чайковскийн нэрэмжит Цетральная Музыкальная Школа болон Монгол Улсын Консерваторт суралцаж төгссөн. Мэргэжлийн төгөлдөр хуурч. Тэрбээр 18 дахь жилдээ төгөлдөр хуураар хичээллэж байгаа нэгэн юм. Энэ хугацаанд АНУ-ын таван мужаар өөрийн аялан тоглолтыг хийсэн. Мөн Итали, Испани, Франц, Герман зэрэг улсуудад эх орноо төлөөлөн тэмцээнд оролцож, I,II,III –р байранд шалгарч байсан амжилттай. Одоогоор Хил хамгаалах байгууллагын 0224 дүгээр ангийн дуу бүжгийн чуулгат ажилладаг юм байна.
Тэрбээр CITTA DI TREVISO нэртэй тэмцээнд дөрөвдүгээр сарын 01-03-ны өдрүүдэд оролцох эрх авсан ч явж амжаагүй байна.
Түүний төлөвлөгөөгөөр энэ сарын 26-нд нисэх төлөвлөгөөтэй байжээ. Учир нь санхүүгийн асуудалтай тулгарсан байна.
Ч.Есөнханд Өмнө нь олон улсын тэмцээн уралдаанд оролцохдоо шаардлагатай зардлыг хувиасаа гаргаж оролцдог байжээ. Гэвч энэ удаа боломжгүй байгаа аж. Тэрбээр Монгол Улсын тэргүүлэх зэргийн 100 гаруй компани руу санхүүгийн дэмжлэг хүссэн, хамтарч ажиллах хүсэлт илгээсэн боловч 10 компани нь дэмжлэг үзүүлэхээс татгалзсан хариу илгээсэн бол 90 гаруй компани нь ямар ч хариу илгээгээгүй гэнэ.
Харин “Premier tailor” компани тэмцээнд оролцох болон байрлах газрын зардлыг ивээн тэтгэж байгаа ажээ.
Уг асуудлаар уран бүтээлч Ч.Есөнханд Соёлын яаманд хандсан байна.
Гэвч манай “хэлбэр” хөөсөн хээнцэр Ч.Номин сайдтан “Энэ жилийн төсөв батлагдсан. Санхүүгийн хувьд дэмжлэг үзүүлэх боломжгүй. Зөвхөн бичиг баримтын асуудалд туслах боломжтой” гэсэн хариу илгээсэн. Мөн Ч.Номин сайд биечлэн уулзах боломжгүй гэжээ.
Угтаа Соёлын сайд Ч.Номинд Монголын соёл урлагийн төлөө гэх сэтгэл зүрх байсан бол, жилийн төсөв дууссан ч хэдэн тэрбумаар хэмжигдэх хөрөнгөнөөсөө өчүүхэн хэсгийг өгдөггүй юмаа гэхэд баячуудын дунд өндөр такстай, хандивын хүлээн авалтыг хийж мөнгө босгон залуу уран бүтээлчдээ өгч дэмжиж болох байлаа. Харин мань сайдад тийм ухамсар, сэтгэл дутжээ. Ийм хүнээр соёл урлагийн салбарынхан толгойлуулж яваа нь даанч харамсмаар…
