Мисс гэхээр хөөрхөн, сайхан, гоолиг байхаас гадна дотоод гоо үзэсгэлэн, хүмүүнлэгийн ажилд гар бие оролцдог бүсгүйг хэлдэг. Тэгвэл яг л энэ жишгээр олны хайр хүндэтгэлийг хүлээж буй мисс бол Б.Бадамцэцэг. 
Шүдний эмч мэргэжилтэй тэрээр мэргэжлийнхээ шугамаар сайн дурын ажлыг зохион байгуулж, найзуудтайгаа нийлэн алслагдсан аймаг, хөдөө орон нутаг, хотын захын дүүргүүдийн хүүхэд багачуудыг үнэ төлбөргүйгээр үзэн оношилж, эмчилдэг. 
Уг ажлынхаа хүрээнд саяхан Булган аймгийн Баяннуур суманд очиж 241 хүүхдэд амны хөндийн үзлэг хийж, шаардлагатай эмчилгээнүүдийг үнэ төлбөргүй хийж өгчээ. Мөн гэрээсээ гарах боломжгүй тусгай асаргаанд байдаг болон нярайн гэрт очиж үзлэг хийж, эмчилгээ зөвлөгөө өгсөн байна.
Мисс бүсгүйн хувьд өдгөө ганц бие ээж бөгөөд амны хөндийн эрүүл мэнд бүх биеийн эрүүл мэндийн суурь хэмээн ойр дотныхондоо хэлдэг.
Өөрөөр хэлбэл, ирээдүйн эрүүл монгол хүнийг бий болгохын тулд одооноос шүдийг нь эрүүл саруул байлгахад онцгой анхаарч буй билээ.
