Цар тахлын хөл хориотой хоёр жилийн хугацаанд Үндэсний телевизээр гарч олныг шуугиулсан Борхүү (буга) гурван нас хүрч, цөх буга болжээ.
Дөнгөж гурван хүрч байгаа ч хангайдаа байгаа нас чацуу буганаас илүү биерхүү, адуу үхрээс өндөр биетэй, эвэр нь гүйцэд урган сүрлэг амьтан болсон гэдгийг уншигч та харж байна.
Борхүү бугыг тэжээгч И.Доржхорлоо гурван хүүтэй бөгөөд анх Борхүүг хангайгаас олохдоо “Манайх дөрвөн хүүтэй болсон. Хамгийн эрх нь Борхүү” гэж байсан нь саяхан. Борхүү хэдий харахад сүрлэг сайхан буга хэдий ч санаа нь нялхаараа дуртай боорцгоо нэхэж, ах дүү нараа даган гүйсэн хэвээр…
Хээрийн зэрлэг амьтан хэдийгээр хүнд ээнэгшин дассан ч хангай талдаа буцах нь жам гэдэг.
Борхүүг энэ намар ижил сүргээ даган, гэрээ орхин явах вий гэсэн санаа зовнил ээж, аавд нь байсан ч гэрээсээ холдолгүй хотондоо хонь хургатай наадан хаваржиж байгаа гэнэ шүү.
