20 гаруй жилийн өмнөөс нэвтрүүлэгч гэдгээрээ олонд танигдсан жүжигчин Ч.Ундрал хоёр дахь амьдралаа өөрөөсөө 10 гаруй насаар дүү залуутай эхлүүлсэн.
МҮОНТ-ийн Хит хөтөлбөрийн хөтлөгч асан Д.Даваанямын хүү Даваадоржтой ханилсан тэрбээр Дагинаа хэмээх хөөрхөн охин төрүүлж өгсөн. Тэгвэл өнөөдөр Д.Даваадоржийн 30 насны төрсөн өдөр тохиож байна. Тэрбээр төрсөн өдрөөрөө хандив болгож түлэнхийн төвд эмчлүүлж буй хүүхдүүдэд хандивласан байна. Энэ тухайгаа тэрбээр “Ингээд 30 нас хүрчих гэж.
Миний хүсэл сонирхлыг хүндэлж хандив илгээсэн найзууддаа маш их баярлалаа.
2.000 төгрөгөөс 1.000.000 төгрөг хүртэл төрсөн өдрийн бэлэг хэлбэрээр сайхан сэтгэлийн өргөл өргөсөнд баярлалаа. Нэгт нэггүй нэр дурдмаар байгаа ч сайхан сэтгэлд хэмжээ үгүй билээ.
Нийт 5.324.700 төгрөг цуглаж өөрөө 3.000.000 сая төгрөг нэмээд, хэвтэн эмчлүүлж буй 16 хүүхдэд тус бүр 500.000 төгрөгөөр туслах зорилготой байсан ч хамгийн хүнд 8 хүүхдэд тус бүр 1 сая төгрөгний эмчилгээний зардал хандивлав.
Хамгийн бага нь 9 сартайгаас 12 настай хүүхэд байв. Энэ зурган дээр инээж орсон ч гуниглаад гарч ирлээ. 12 той хүүгийн жишээ гэхэд л дүү нараа хараад дулаацуулах гэж гал асааж байгаад өөрөө 60 хувийн түлэгдэлтэй 5 удаа хагалгаанд оржээ 😞
Хүүхдүүддээ сайн асарч хамгаалаарай.
Хүүхэд бүрт торт сэтгэлээсээ илгээсэн Милая Сүлжээ хамт олонд маш их баярлалаа. Дүү нар маань чихэрлэг зүйл идэж болохгүй тул гэмтлийн эмнэлгийн түлэнхийн тасгийн эмч сувилагч нартаа өгчихлөө.
Сайн үйлс бүхэн дэлгэрэх болтугай !
Үлдсэн насаа үргэлж бусдын сайн сайхны төлөө зориулах болно.
Би өөрөө хайртай хүнээ аварч болох байж аварч чадаагүй мэдрэмжийг ямар муухайг мэддэг болохоор ингээд ч болов уу бяцхан тус хүргэе гэж шийдсэн юм.
Дэмжсэн найз нартаа баярлалаа, та бүхний тус хэдэн мянга үржих болтугай.
Төсөөллийнхөө хязгаарыг тултал жаргалтай, эрүүл энх амьдраарай.
Жич: Хүүхдүүдийн тус болж байгаа зураг тавих дэмий бизээ.
2022.04.28″ гэжээ.
