УИХ-ын гишүүн Т.Доржханд анхлан парламентад орж ирэхдээ л олноос онцгойрч байсан. Өдгөө өөрийн танхимын гишүүдээ огцрохыг шаардан, тайван жагсаал хийж яваа тэрбээр гишүүний үнэмлэхээ гардахдаа л үдээсгүй пүүз, даавуун өмдтэй морилж олныг алмайруулж байв.
Төрийн ордны босгыг бишгүйдээ л нэг элээсэн түүний хувьд үүнийг мэдэхгүй байна гэж байхгүй. Гэвч түүний пи ар зөвлөх гэх нөхөр ийнхүү олноос онцгой байхыг эрхэм гишүүнд сануулсныг ч өөрөө хэлдэг. Хувийн өчүүхэн пи араа хийхийн тулд Монгол төрийн хуулийг зөрчиж болдог, Төрийн ордны дотоод журам “май шүү” гээд үйлдлээрээ харуулдаг тэрбээр энэ удаад ч бас попорсоор яваа. Жагсаал хэзээ ч үр дүнгээ өгдөггүй гэдгийг мэдсээр байж, олны анхаарлыг өөртөө татаж ийнхүү хөрөнгө мөнгө, цаг зав гарган жагсаал хийж буй нь цаанаа их учиртай байх.
Төрийн хууль тогтоох байгууллагад дөрвөн жил хууль тогтоогч болж, хууль батлалцахаар ирсэн бол хувийн пи ар популист зангаа гээх ёстойг түүнд сануулдаг хүн үгүй бололтой. Ямартай ч түүний хувьд толгой доторхоо таниулахаасаа өмнө ЭГО зангаараа онцгойрсон нь өөрийг нь таниулж өгсөн юм.
Ж.Батзандан, Л.Болд тэргүүтэй популист гишүүдээсээ дөнгөж салсан Монголын төрд цоо шинэ популист өнгө нэмэн орж ирсэн нь Т.Доржханд болов.
