Улаанбаатар хотын замын түгжрэл шүдний өвчин болоод уджээ. Улсын бүртгэлд нэг сая гаруй тээврийн хэрэгсэл байна.
Түүний 650 мянга нь нийслэлд бүртгэлтэй байдаг гэх судалгаа бий. Тэдгээр тээврийн хэрэгслүүдийн эздэд оношлогоо, даатгал, бусад үйлчилгээг ойртуулах үүднээс Авто тээврийн үндэсний төв салбаруудаа энд тэнд түрээсийн байруудад байршуулан ажлуулдаг.
Тэгвэл энэ сарын 10-наас буюу маргаашаас Гурвалжингын гүүрний тэнд орших Хөсөг трейд ХХК-ны байранд дахь Авто тээврийн үндэсний төвийн оношлогоо, бүртгэл нүүдэл суудал хийж, 1 хорооллын Эрин интернэйшнл ХХК, Мастер плаза зэрэг газар төвлөрүүлэхээр болжээ.
Энэ орчимд Хархорин зах, Барс-2 зах, Номин дэлгүүр зэрэг томоохон худалдаа үйлчилгээний төвүүд оршдог учраас байнгын авто замын ачаалалтай, түгжрэл ихтэй байдаг.
Гэтэл АТҮТ-ийнхөн энэ бүгдийг тооцоололгүй, нийслэлийн удирдлагууд болон тээврийн цагдаагийн алба зэрэгтэй үл тохирон ийнхүү шийдвэр гаргасан бололтой.
Нийслэлийн Засаг дарга Д.Сумъяабазар хотын түгжрэлийг бууруулах гээд “үйл тамаа үзэж, үстэй толгойгоо зулгааж” суухад АТҮТ ийм том толгойтой байж болохгүй.
Хотын дарга даамлынхаа ажил, иргэдийн түгжрэл нөгцөөх цаг завыг боддоггүй юмаа гэхэд, үргэлжийн холбоотой ажилладаг Тээврийн цагдаагийн албаны цагдаа нарын ачааллыг бодсонгүй хэрэг үү, тэд нийслэлийн авто замын түгжрэлийг бууруулахын тулд өдөр шөнөгүй зүтгэж байгааг нь мэдмээрсэн.
