Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхэд олимпын аварга Н.Түвшинбаярт холбогдох хэргийн гэм буруугийн шүүх хурал 09.30 цагт эхэлнэ.
Хан-Уул дүүргийн прокурорын газраас Н.Түвшинбаярт холбогдуулан Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх заалтад зааснаар “Хүнийг онц харгис хэрцгийгээр алсан “, мөн хуулийн 17.8 дугаар зүйлийн 1 дэх хэсэгт заасан “Бусдын эд хөрөнгийг хууль бусаар устгасан, гэмтээсэн” зүйл ангиар яллах дүгнэлт үйлдэж шүүхэд ирүүлсэн юм.
Дөрөвдүгээр сарын 29-нд Н.Түвшинбаярт холбогдох хэргийн урьдчилсан хэлэлцүүлэг болж, гэм буруугийн шүүх хуралдааныг тавдугаар сарын 12-ны 09.30 цагт товлосон.
Гэм буруугийн шүүх хуралдаан хаалттай болох бөгөөд улсын яллагчаас гадна хоёр талын өмгөөлөгч, 10 гэрч, хохирогчийн гэр бүлийнхэн оролцох аж.
Өчигдөр орой хохирогч Э.Энхбат агсны гэргий Б.Нандинцэцэг шүүгдэгч Н.Түвшинбаярын өмгөөлөгч шүүгчид нөлөөлөх оролцлого хийсэн тул Цагдаагийн ерөнхий газарт хандаж байгаагаа мэдэгдсэн юм.
Яллах дүгнэлт үйлдсэн хуулийн заалтаас:
Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1
2.1.Хүнийг онц харгис хэрцгийгээр алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.
17.8 дугаар зүйл.Эд хөрөнгө устгах, гэмтээх
1.Бусдын эд хөрөнгийг хууль бусаар устгасан, гэмтээсний улмаас бага хэмжээнээс дээш хохирол учруулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.
