Хөх тэнгэрийн дайчин бүргэд 70 насладаг

Жигүүртэн дундаа хамгийн урт насалдаг нь бүргэд. Гэвч бүргэд шувуу ийнхүү урт наслахын тулд амь дүйсэн хүнд шийдвэрийг гаргах болдог. Учир нь бүргэд 40 нас хүрээд үхэх, сэхэхийн аль нэгийг сонгох хэрэгтэй болдог байна. Тэнгэрийн хөх мандалд 40 жил халин ниссэн энэ дайчин шувууны далавч өд сөдөндөө дарагдаж, ан авлах төдийгүй дэвэн нисэхэд хүртэл төвөгтэй болдог аж.
Бүргэд 40 наслаад тэнгэрийн мандлаас үүрд сарнин алга болдог бол халуун сорилтыг яс зааж туулсан хэсэг нь цаашид амьдардаг аж. Тэгж шийдсэн бүргэд өндөрлөг газар үүрээ сайтар базаагаад өөрийн өд сөдийг хайр найргүй зулгааж эхэлнэ. Хүнд хөнгөн гэлтгүй хамаг өд сөдөө асар их өвдөлтийг даван байж эвэр хошуугаараа сугачин хаяна. Тэнгэрээр нэг салхинд хийсэх өдний эзэн хөөрхий бүргэд ийнхүү харгис гэмээр ч үхэхгүйн тулд өөрийгөө “нүцгэлж” орхино.
Тэр мөчөөс хойш дараагийн 150 хоногийн турш жинхэнэ хар дарсан зүүд үргэлжилнэ. Өд жигүүргүй болсон анч бүргэд үүрнээсээ нисэх нь байтугай холдох ч тэнхэлгүй өлсөж ядрахын туйлийг гэтэлнэ. Нар, салхи, бороо, шороо гээд халуун хүйтний халийг дааж, туулах шалгуур зугуухан хөвөрнө. Таван сар ийнхүү шазуур зааж, тэвчээрийн хатыг сэтлээд сая нэг өд сөд идэр залуу бүргэдийнх шиг сөдөлж дуусна. Ингэж тэсч чадсан дайчин бүргэд дахин 30 жил тэнгэртээ халин нисэх тэнхэл олдог. 30 жил! Ингэж тэд 70 насалдаг.