“Монгол HD” телевизийн дэд захирал, хөтлөгч, нэвтрүүлэгч С.Чимгээ өчигдөр “алтан хамтрагч” нэвтрүүлэгч Ч.Ичинхорлоог СГЗ цолоор шагнуулах үед ирж баяр хүргэжээ. Тус агшинг манай папараци гэрэл зургийн дурандаа буулгасныг онцолж байна.
Түүний хувьд хотын унаган охин. 120 мянгатад гудамжны цементийг шүүрдэж, бор чулуугаар хоол хийж айл гэр болж тоглож өссөн гэдэг. Хүүхэд байхдаа Оросын телевиз дээр гардаг “Үлгэрийн орноор зочилсон нь” /”В гостях у сказки”/нэвтрүүлгийг шимтэн үздэг байснаа дурссан удаатай. Арван жилээ төгсөөд ОХУ-д мюзик холлын жүжигчний мэргэжлээр суралцахаар шалгалт өгч Орост сургуульд явж байжээ.
Нэвтрүүлэгч С.Чимгээ Ч.Ичинхорлоо нар олон жилийн нөхөрлөлийн түүхтэй. Энэ тухайгаа С.Чимгээ “Телевизийн нэвтрүүлэгчийн шалгалт авахад Ч.Ичинхорлоо бид хоёр шалгалт өгөөд тэнцэж байлаа. Ч.Ичинхорлоо маань тэнцэж шууд нэвтрүүлэгчээр ажиллахаар болж, харин намайг орон тоо сулрангуут оруулахаар болсон юм. Ингээд ганц хоёр сар “Урам” нэвтрүүлэг дээр найруулагчийн туслах хийж байгаад нэвтрүүлэгчийнхээ орон тоон дээр очиж байлаа.
Тухайн үед МҮОНТ “Урам” гэх маш оюунлаг нэвтрүүлэг хийж байсан үе. Тэр нэвтрүүлгийн редактор, найруулагч Ардын зураач Л.Намхайцэрэн агсны хүү Н.Ганбат гэх мундаг хүний туслахаар ажиллаж, тэр нэвтрүүлгийн хөтлөгчөөр бас хэсэг зуур ажилласан юм. Маш оюунлаг, маш их уншдаг хүн байсан, Ганбат найруулагч. Дэндүү их юм зааж сургаж өгсөн, надад. Тэднийх хоёр сайхан охинтой. Би бодвол охин шиг нь санагддаг байсан байх. Дөнгөж дээд сургуулиа төгсөөд гариг андуураад ирчихсэн юм шиг хүн явж байлаа шүү дээ, би чинь. Телевизийн хөтлөгчийн биеэ зөв авч явах соёл, ном унших, харилцаа хандлагын талаар маш олон зүйл хэлж өгч, ажил хөдөлмөрийн их замыг минь сүүгээр мялааж өгсөн юм уу даа гэж одоо боддог. Тэр их айл олон хүний амьдралын гэрэлт замын эхлэл болсон, болсоор ч байгаа газар даа” хэмээн ярьжээ.
