Драмын урлагийн бүхий л төрөлд хувьсан тоглох чадварлаг уран бүтээлч, Монгол Улсын гавьяат жүжигчин Ж.Оюундарийг бид папараци дурандаа онцолж байна. 
Хэзээд нэг зангаараа байдаг, эелдэг зөөлөн характераараа үзэгчдийн хайрыг татдаг тэрбээр хайр татам инээмсэглэлээ цацруулсан хэвээрээ манай дуранд буужээ.
Эрхэм жүжигчин бүсгүйн хувьд өдгөө 50 насны босго алхсан нэгэн. Ардын жүжигчин Л.Жамсранжавын охин, удам залгасан жүжигчин хэмээн хүндэлдэг түүний ээж Ө.Уранчимэг нь олон жил УДЭТ-т нүүр хувиргагч хийсэн эмэгтэй байдаг гэнэ лээ.
Багадаа эмч болохыг хүсдэг байсан Ж.Оюундарь аравдугаар ангиа төгсөөд гадаадад Анагаахын сургуульд сурах боломж байсан хэдий ч эцсийн мөчид урлагийг сонгосон гэдэг.
Анх оюутан байхдаа “Ромео Жульетта” жүжгийн Жульеттагийн дүрд тоглож байсан тэрээр 1992 онд СУИС-ийг төгссөнийхөө дараа “Аянгын бороо” жүжгийн Сифаны дүр мөн түүнтэй зэрэгцээд “Худалч эхнэр” жүжгийн Кетти гэх гол дүрийг бүтээжээ.
Ийнхүү инээдмийн болон драмын эсрэг тэсрэг дүрүүдийг нэгэн зэрэг бүтээх боломж түүнд олдсон юм. Дөнгөж сургуулиа төгссөнийхөө дараахан аавтайгаа хамт “Нүглийн золиос” кинонд тоглож байсан. Мөн “Эзэнгүй айл”, “Угсраа мэх”, “Ромео, Жульетта”, “Хүйтэн сэнтий” зэрэг жүжигт хамтарч тоглож байсан юм.
