Монголбанкны Ерөнхийлөгч Б.Лхагвасүрэн эрхэм гишүүнд үг шивнэв

Монголын улс төрд томоохон байр суурь эзэлдэг хүн бол Монголбанкны Ерөнхийлөгч Б.Лхагвасүрэн. Нийт 341 сая төгрөгөөр үнэлэгдэх хоёр орон сууц, нэг зуслангийн байшинтай бөгөөд өөрийн нэр дээр автомашингүй хэмээн хөрөнгө орлогын мэдүүлэгтээ дурьдаж явсан түүнийг УИХ-ын гишүүн Б.Пүрэвдоржтой чухам ойр дотно, шивнээ үг шивнэлдэж байх агшныг манай папараци дуран буулгажээ.
Монголбанкны Ерөнхийлөгч Б.Лхагвасүрэнгийн хувьд хүү Л.Тэмүүжингээ 2022 онд Хөгжлийн банканд газрын захирлаар томилогдсон. Энэ тухайгаа тэрбээр “Миний хүү Хөгжлийн банкийг анх байгуулагдсан цагаас нь мэргэжилтнээс эхлэн ажилласан. Монголбанк тус банкны дотоод үйл ажиллагаанд оролцдоггүй учир саях томилгоонд оролцоогүй” гэсэн байр суурь илэрхийлсэн юм.
Түүний хувьд улс төрд багагүй нөлөөтэй Х.Баттулга, Сангийн сайд Б.Жавхлан нартай ойр дотно холбоотой гэгддэг. Мөн өөрийн нэр дээрх ТББ-аа Төвбанкны Эрдэнэсийн сантай холбосон байдаг. Тодруулбал, “Монголын зоос судлалын холбоо” НҮТББ-ыг 2015 онд үүсгэн байгуулжээ. Улмаар уг холбоо Монголбанканд хүсэлт гаргасны дагуу 250 мянган төгрөгийн үнэ бүхий “Хубилай” мөнгөн зоосыг цутгуулан зах зээлд гаргаж байжээ. Нийт 2500 ширхэг цутгагдаж байсан уг зоосны арилжаалагдах хаягт Монголбанкны “Эрдэнэсийн сан”-г тодотгож өгсөн байна.
2018 онд Монголбанкны “Эрдэнэсийн сан”-тай хамтран, “Монголчуудын төлбөрийн хэрэгсэл эртнээс эдүгээ” нэртэй үзэсгэлэн дэлгэж, ховор үзмэрүүдийг олны хүртээл болгож байжээ. Улмаар “Монголын банкны холбоо”-той хамтран, “Банкны хөгжил-95” үзэсгэлэн зохион байгуулжээ.
Товчхондоо, зоос цуглуулгын талдаа төр, арилжааны банкнуудтай хамтарч чаддаг, томоохон лоббиг хийж чаддаг нөхөр юм.