Иргэн Анар нь “Отгон” ХХК-ийн захирлын 2020 оны 02 дугаар сарын 10-ны өдрийн тушаалаар ажлаас үндэслэлгүй халагдсан тул ажилд эгүүлэн тогтоолгож, нөхөн олговор гаргуулахаар шүүхэд нэхэмжлэл гаргасан. Хариуцагч “Отгон” ХХК-ийн захирлаас “…гэрээний хугацаа дууссанаар ажлаас чөлөөлсөн” гэж тайлбарлажээ.
Нэхэмжлэгч Анар нь “Отгон” ХХК-д богино хугацааны уурхайн төлөвлөлтийн техникчийн албан тушаалд ажиллаж байсан бөгөөд уг ажлын байр нь байнгын ажлын байр эсэх, үүнтэй холбоотойгоор уг ажлын байранд хугацаатай гэрээ байгуулж болох эсэх асуудлаар талууд маргасан байна.
Хөдөлмөрийн тухай хуулиар үйл ажиллагааны онцлог, бизнесийн хэрэгцээ, шаардлагыг харгалзан байнгын бус ажлын байранд хөдөлмөрийн хугацаатай гэрээ байгуулж болохыг зөвшөөрсөн байдаг.
“Отгон” ХХК-ийн бүтэц зохион байгуулалтыг баталсан баримтаас үзэхэд нэхэмжлэгчийн ажиллаж байсан “уурхайн төлөвлөлтийн техникч” гэх ажлын байр нь байнгын бус ажлын байр буюу гэрээт ажил болох нь тогтоогдсон тул анхан шатны шүүхээс, ажил олгогч ажилтантай тохиролцсоны үндсэн дээр байнгын бус ажлын байранд хугацаатай хөдөлмөрийн гэрээ байгуулсан нь хууль зөрчөөгүй, хугацаатай хөдөлмөрийн гэрээ дуусгавар болж чөлөөлөгдсөн ажилтныг эгүүлэн томилох боломжгүй гэж дүгнэн, нэхэмжлэлийн шаардлагыг хэрэгсэхгүй болгож шийдвэрлэсэн байна.
Нэхэмжлэгчийн “байнгын ажлын байранд хөдөлмөрийн хугацаатай гэрээ байгуулах болсныг нотолж чадаагүй, хууль буруу хэрэглэсэн” гэх гомдлоор давж заалдах шатны шүүх хэргийг хянаад, гомдол үндэслэлгүй байсан тул шүүхийн шийдвэрийг хэвээр үлдээв.
Хураангуй бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Дэлгэрцэцэг
