ХӨСҮТ-өөс Ковид-19 халдварын нөхцөл байдлын талаар өнөөдөр /2023.01.26/ мэдээлэл хийлээ. Энэ үеэр ХӨСҮТ-ийн захирал Ц.Билэгсайхан “ХДХВ/ДОХ-ын вирусийн халдвартай иргэн ХӨСҮТ-ийн хашаанд нас барсан гэх мэдээллийн дагуу хариу мэдээлэл өглөө. 
“Энэ хүн манай төвийн хяналтад байдаг, хэвтэн эмчлүүлж байсан. ДОХ/ Сүрьеэгийн хавсарсан халдвартай иргэн байсан бөгөөд өөрийн хүсэлтээр эмнэлгээс гэртээ гарсан байсан. Нэгдүгээр сарын 23-ны өдөр ХӨСҮТ-ийн хашаанд тусламж авч чадалгүй нас барсан гэж зарим хэвлэл ташаа мэдээлэл” гэв.
Мөн тэрбээр Ковидын нөхцөл байдал хэр байгаа талаар мэдээлэл өгч, өнгөрсөн долоо хоногт дэлхий даяар 1,8 сая гаруй батлагдсан тохиолдол бүртгэгдсэн. Энэ нь өмнөх долоо хоногоос 33 хувиар буурсан үзүүлэлттэй байгаа юм. АНУ, Япон, БНСУ, Хятад, Бразил зэрэг улсуудад тохиолдлын тоо өндөр байна. Дэлхий нийтэд дэгдэлтүүдийг үүсгэж байгаа хувилбаруудыг судалсан байна. Үүнд 85 мянга гаруй сорьцонд хувилбарын тандалтыг үзэхэд, Омикорны BA5 гэх хувилбар сорьцны 70,5 хувийг эзэлж байна. Үлдсэн хувьд нь BA2, BF7, BQ1, XBB зэрэг хувилбарууд тодорхойлогдож байна.
Урд хөршид сүүлийн 24 цагт 19 мянга гаруй тохиолдол бүртгэгджээ. Өнгөрсөн долоо хоногт 122 мянга гаруй тохиолдол бүртгэгдсэн хэмээн мэдээлсэн.
Монгол Улсын хувьд 2023 оны гуравдугаар 7 хоногт 23 шинэ тохиолдол бүртгэгдсэн нь өмнөх 7 хоногоос 50%-аар буурсан байна. Өнөөдрийн байдлаар 11 хүн эмнэлэгт Ковид-19 оноштойгоор хэвтэн эмчлүүлж байгаа бол 16 хүн хяналтад байна. Хамгийн сүүлийн 16 сорьцийн 15 буюу 96%-д нь BQ1.2 гэдэг омикроны дэд хувилбар тодорхойлогдсон байна. Нэг сорьцонд BA5.2 хувилбар тодорхойлогджээ” гэв.
