Хоёр жилийн хугацаанд цомхон сар шинийн баяр тэмдэглэсэн монголчууд энэ жил усан туулай жилээ хотол олноороо өргөн тэмдэглэхээр зэхэж буй. 
Үүнтэй холбоотойгоор сүүлийн хэдэн өдөр томоохон дэлгүүр, худалдааны төвүүдийн ачаалал жирийн үеийнхээс даруй хэд дахин нэмэгдсэн. Гэвч зогсоолын асуудлаас болж, тэдгээр дэлгүүр, худалдааны төвүүдийг дагасан авто замын түгжрэл үүсээд байгаа нь илт. Өөрөөр хэлбэл, үйлчилгээний газрууд авто зогсоолынхоо ачааллыг шийдэж чадаагүйн улмаас нийслэлийн авто замын түгжрэлд нэлээдгүй хэмжээний ачааллыг нэмээд байна. Иймд үйлчилгээний газруудад автозогсоолын зай талбайн стандарт хэмжээг тогтоож өгөхийг “Түгжрэл”-ийн сайд буюу Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар , Улаанбаатар хотын дарга Д.Сумъяабазар нараас хүсмээр байна.
Түүнчлэн, автозамын ачаалал ихтэй байхад Тээврийн цагдаагийн албаныхан “үлээлгэж” зохиомол түгжрэл үүсгэж буй. 
Хэдийгээр тэдний ажил мэргэжил ч гэлээ, хэзээ, хаана, ямар үед энэ ажлаа хийх ёстой мэт санагдаж байгааг иргэн хүний үүднээс хэлмээр байна.
Ямартаа ч, ирэх усан туулай жилдээ зохиомол болон зохиомол бус түгжрэлийг хэн хүнгүй үүсгэхгүй, нэг нэгэндээ авто замын дарамт үзүүлэхгүй шинэлэхийг ерөөе.
