Ардын уран зохиолч, Төрийн шагналт зохиолч Бавуугийн Лхагвасүрэнгийн “Тамгагүй төр” эмгэнэлт түүхэн жүжгийг найруулагч Б.Баатар физикл драмын төрлөөр найруулан өнгөрсөн жил тавьсан билээ.
2022 оны наймдугаар сард 100 дахь тоглолтоо хийсэн “Тамгагүй төр” жүжгийг “The Mongol Khan” нэртэйгээр ИБУИНВУ-ын нийслэл Лондон хотын West End театрт тоглохоор бэлтгэл хангаж эхэлжээ. Тоглолтын зар сурталчилгаанууд дэлхийн том сайтуудаар тарж эхэлсэн бөгөөд ирэх 11 сарын 23-наас тоглох юм байна. West End нь дэлхийн хамгийн өндөр түвшний театруудын нэг бөгөөд жуулчид олноор очдог урлаг соёлын байгууллага аж.
“Тамгагүй төр” жүжиг Улсын драмын эрдмийн театрын тайзнаа өнгөрсөн дөрөвдүгээр сараас эхлэн тасралтгүй 70 удаа тоглоход 40740 үзэгч үзэж, 5 тэрбум төгрөгийн орлого олсон гэх статистикийг мэдээлсэн ба орлого, үзэгчдийн тоогоороо Монголын соёл урлагийн түүхэн дэх дээд амжилтуудыг тогтоосон.
Тус жүжгийг өнгөрсөн долоодугаар сарын 10-наас эхлэн Монголд ирж буй жуулчдад зориулж Монголын нэрт дуун хөрвүүлэгчдээр жүжгээ англи, хятад, солонгос хэлнээ буулган үзүүлсэн юм.
