Монгол улсын Засгийн газар болон НҮБ-ын Хүнс, хөдөө аж ахуйн байгууллага хамтран ажилласан 50 жилийн ой тохиож байгаатай холбогдуулан сэтгүүлчдэд танилцуулга мэдээлэл өгөх уулзалт зохион байгууллаа. Уулзалтаар НҮБ-ын Хүнс, хөдөө аж ахуйн байгууллагын суурин төлөөлөгч Винод Ахужа, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн хамтран хэрэгжүүлсэн төсөл хөтөлбөрүүдийн талаар сэтгүүлчидтэй нээлттэй ярилцаж, хариулт өглөө.
НҮБ-ын ХХААБ-д Дэлхийн 194 орон гишүүнээр элссэн бөгөөд өлсгөлөнг устгаж, амьдралын суурь болсон эрүүл хүнсийг хүн бүрд хангах нөхцөл боломжийг бүрдүүлэх зорилго дор нэгддэг.
Манай улсын хувьд 1973 онд НҮБ-ын Хүнс, хөдөө аж ахуйн байгууллагад (ХХААБ) гишүүн орноор элссэн орсон бол Монгол улсын Засгийн газрын хүсэлтийн дагуу НҮБ-ын ХХААБ-ын төлөөлөгчийн газар 2009 онд байгуулагдаж, 2018 оноос бүрэн эрхт төлөөлөгчийн газар ажиллаж эхэлсэн.
Өнгөрсөн 50 жилд НҮБ-ын ХХААБ Монгол улсын Засгийн газартай хамтран 200 гаруй төсөл хөтөлбөрүүдийг хэрэгжүүлсэн нь монголчуудын аж амьдралд үр өгөөжөө өгсөн байна.
Тухайлбал сүүлийн 20 жилд хийсэн ажлуудаас онцолбол зудын гамшгийн хүндрэлийг даван туулах хариу арга хэмжээнд яаралтай тусламжийг өдийг хүртэл нийт 20 мянга гаруй эмзэг бүлгийн малчин өрхөд хүргэсэн ургамлын хорио цээрийн хүлэмжийг Монголд анх удаа хамтран байгуулсан,
Жимс ногоог түргэн хөлдөөх технологи, луувангийн шүүсний цех, төмс, булцуут ургамлыг хуурай аргаар сойздох технологийг анх удаа нэвтрүүлсэн,
Цахим хөдөө аж ахуйн үндэсний стратегийг боловсруулахад дэмжсэн,
Монгол Улсын хүнсний тогтолцооны системчилсэн дүн шинжилгээг хамтран хийсэн зэрэг ажлуудыг дурдаж болно.
Төслийн үйл ажиллагааны чиглэлүүд нь байгалийн нөөцийн тогтвортой менежмент, мал аж ахуй, газар тариалан, түүний бүтээмж, чанарыг дээшлүүлэх, онцгой байдлын менежмент, даван туулах чадвар, шинжилгээ судалгаа, статистик, шинэ технологи инновац дамжуулалт, бодлого, эрх зуйн орчин, хүнсний чанар, аюулгуй байдал, шим тэжээл юм.
НҮБ-ын ХХААБ 50 жилийн ойгоо тохиолдуулан “Уур амьсгалын өөрчлөлт, цөлжилт, газрын доройтол” хүнсний тогтолцооны тогтвортой байдалд үзүүлэх үр дагавар хэлэлцүүлгийг Байгаль орчин, аялал жуулчлалын яам, Хүнс, хөдөө аж ахуй, хөнгөн үйлдвэрийн яам, Гадаад харилцааны яамтай хамтран 8-р сарын 24-ний өдөр Дундговь аймагт зохион байгуулна. Арга хэмжээний үеэр уур амьсгалын өөрчлөлт, цөлжилт, газрын доройтлын чиглэлээр олон улсын байгууллагуудын Монгол улсад хэрэгжүүлж буй ажлын үр дүн, уур амьсгалын өөрчлөлтөд дасан зохицох арга хэмжээ, Монгол орны бэлчээрийн төлөв байдалд гарсан өөрчлөлт, нөхөн сэргээх шийдлүүдийн талаар хэлэлцэх юм.
