Цагдаа хүн төрдөө тангараг өргөсөн болохоор хүссэн ч эс хүссэн тушаалаар хөдөлдөг. Харин тушаал нь хууль зөрчсөн байх тохиолдол гарч, хүний эрхийн зөрчил гаргах нь элбэг байдаг. Гэвч энэ талаар цагдаа нар ам нээх эрхгүй байдаг нь цагдаагийн байгууллагад хүний эрхийн зөрчил гаарсан гэдгийг ар гэрийнхэн нь баталдаг.
Тэгвэл Булган аймгийн цагдаагийн газрын алба хаагч ахмад О.Цэлмэг өөрийн цахим орчиндоо зоригтойгоор шүгэл үлээж, байр сууриа илэрхийлж байна.
БУЛГАН АЙМГИЙН ЦАГДААГИЙН ГАЗРЫН ЭРХЭМ ХҮНДТЭЙ ДАРГА НАРТ ХАЯГЛАВ
Миний бие цагдаагийн ахмад цолтой Улаанбаатар хотоос Булганы цагдаагийн газарт хэсгийн төлөөлөгчөөр томилогдон ирээд 11 сар болж байгаа.
Энэ байгууллага нь шударгаар үгээ хэлсэн хүнд халтай, адлах дуртай, хавчиж шахах тал дээр маш сайн гэхүүдээ. Булган нутаг бол дэндүү сайхан байгальтай газар гэдгийг мэдэж авсан боловч Цагдаагийн газрын дарга нар болох газрын даргаар ажиллаж байсан хурандаа Л.Ганбаатар, дэд дарга дэд хурандаа Б.Баттулга, Захиргааны тасгийн дарга, дэд хурандаа Б.Өнөрбат, Замын тасгийн дарга, дэд хурандаа Д.Мягмаржав нар та бүхэн хүн чанартай, хүнлэг, шударга байх хэрэгтэй шүү. Шударга Үг хэлсэн алба хаагчийг гадуурхаж, пальдиганаж тал зассан алба хаагчийг сайн гэж дүгнэдэг асуудлаа одоо орхих хэрэгтэй гэж хэлье.
Цагдаагийн байгууллагад судалгаагаар нийт 10,000 гаран албан хаагч ажилладаг ба хүнийг ойлгодог сайн даргатай, сайн хамт олонтой газрууд ч зөндөө байдаг гэдгийг дурдмаар байна шүү. Чингэлтэй, Сүхбаатар дүүргийн цагдаагийн газар, Эрүүгийн цагдаагийн алба гэх мэт.
Булганы цагдаа яачихсан газар бэ? Үнэхээр ойлгохгүй юм, мөрөөрөө ажлаа хийгээд явахлаар ад үзнэ, цалин хасна. Асуухлаар ямар ч үндэслэлгүй хасдаг. Жишээ нь эхний хагас жилийн байдлаар цалин хассан үндэслэл нь тасгийн ажил унасан, гэмт хэргийн илрүүлэлт багассан гэсэн үндэслэлээр хассан байдаг.
Өмнө өөр газруудаар ажиллахад яг ийм бүдүүлэг асуудалтай тулгарч үзсэнгүй дээ.
Зарим хүмүүс намайг чи ингэж хэл ам хийх хэрэг байна уу, усыг нь уувал ёсыг нь дагах хэрэгтэй гэж хэлэх юм. Энэ бол маш буруу гэж хэлмээр байна, учир нь ийм бүдүүлэг, ёс суртахуунгүй, хүний эрхийн мэдрэмжгүй, ажилтан алба хаагчийнхаа аж амьдралыг тоодоггүй, хөсөр хаядаг Булганы Цагдаагийн эрхэм хүндтэй мундаг дарга нартай хэзээ ч эвлэрэхгүй шүү гэдгийг энд зориуд тэмдэглэе.
Тэгээд миний ярианы биллийг Хошууч Ж.Амарсанаа гэх албан тушаалтан ямар хүнтэй, ямар зорилгоор хэдэн минут ярьсан гэдгийг шалгаж эхлээд Рашаант сумын цагдаагийн тасгийн дарга, ахмад Ж.Бээжин, Хангал сумын тасгийн дарга, ахмад н.Батцэнгэл нарыг дуудаж миний гар утасны дугаартай ямар зорилгоор яах гэж ярьсан талаар тайлбар бичүүлж авсан байна гэдгийг би өнөөдөр олж мэдлээ.
Олон жилийн өмнө цагдаагийн нэг даргаас танил нь эхнэрээ хардаад гар утасныхан биллийг аваад өг гэж авхуулаад хүн амины хэрэг гарсан гашуун туршлага сонсож байсан шүү. Миний энэ асуудал ер нь энэтэй өнгө ижил гэхэд болно.
Одоо яах уу Булганы цагдаа будилаан хийж Прокурор руугаа чихэх байхдаа тийм ээ ?
Газрын дарга Ганбаяр та чинь прокуророос лавла гээд байсан тийм ээ. Надад хэцүүхэн л байна.
Би нялх хүүхэдтэй гэр бүлээрээ хүний нутагт уг нь ажиллаж амьдрахаар ирсэн юм даа.
Булганы цагдаагийн газар дотроо бугшсан алдаа завхарлаа хэзээ арилгаж дуусах бэ, дарга нар та нар хэзээ юм ойлгож ухаарах бэ, хэзээ алба хаагчаа боддог болох бэ???
Булганы цагдаагаас болж нийт Монголын цагдаагийн байгууллага яригдаж байна эмгэнэл юм даа.
БУЛГАНЫ ЦАГДААГИЙН ГАЗАР албаны шалгалтаар алба хаагчийнхаа гар утасны ярианы түүхийг хууль бусаар авсан үйлдлээ олон нийтэд тайлбарлаарай.” хэмээн цахим хуудастаа бичсэн байв.
Үүний дараа тэрбээр Булган аймгийн цагдаагийн газрын дарга, удирдлагууд хууль бусаар алба хаагч нараа хэрхэн “дарамталсан” талаар баримттай бичсэн байв. Тодруулбал,
Булган аймгийн Цагдаагийн газрын дарга, удирдлагуудын хууль бусаар алба хаагч нараас нэг өдрийн цалин хурааж, үндэслэлгүй цалин хассан талаарх дараагийн баримт
1. 2023 оны эхний хагас жилийн байдлаар буюу 2023.06.23-ны өдрийн цалин хасах тухай тушаалаар нэр бүхий 42 алба хаагчдын цалинг 10-20 хувь хассан боловч хассан тушаалаа 2023 оны 07 сард өглөөний яриан дээр танилцуулсан.
Энэ үед нөгөө хэдэн алба хаагч нар нь цалингаа хасуулснаа мэдэж байгаа юм. Энэ бол хөдөлмөрийн тухай хууль зөрчиж байгаа бүдүүлэг үйлдэл шүү. Ажил олгогч ажилтанд урьдчилж цахимаар болон бичгээр мэдэгдэх үүрэгтэй байдаг шүү хуулиа уншина уу.
Хассан үндэслэл нь инээдтэй : 1. Санд алдаатай мэдээлэл оруулсан 2. Үндсэн үүрэгт ажлаа хангалтгүй хэрэгжүүлсэн г.м
Би бол эхний хагас жилээр бараг цалингаа нэмүүлэх байх, хэдэн хэрэг шийдсэн дээ ухааны юм л бодоод явж байж дээ хөөрхий. Тэгээд энийг газрын дарга хурандаа Л.Ганбаатараас асуухаар “эрүүгийн тасгийн гэмт хэргийн илрүүлэлт муу байна” гэж хэлж байгаа юм даа.
2.2023.04.15-ны өдөр Булганы цагдаагийн даргаар ажиллаж байсан хурандаа Л.Ганбаатар гэдэг хүн байгууллагын гаднах шат довжоо янзлах нэрийдлээр 140 гаран алба хаагчдын цалинг авах шийдвэр гаргаж, хүн бүрээс нэг өдрийн цалин авсан. Би гэхэд нэг өдрийн цалин 93,600 төгрөг хураалгасан. Энийг тасаг тасаг дотооддоо хураалгасан. За яахав зарим нэг дотор нь ажиллаж байгаа алба хаагч нараас “юун сүртэй юм, цагдаагийн газраа хандивлаа л биз” гэж хэлэх байх өө. Энд сүртэй юм яриагүй энэ асуудал таслан зогсоогдох ёстой гэдгийг үүгээр мэдэгдье” хэмээжээ.
Түүний ийнхүү бухимдаж байгаа нь аргагүй юм. Учир нь цагдаагийн алба хаагч цаг наргүй ажилладаг. Мөн цагдаагийн байгууллагад арын хаалгагүй бол бор зүрхээрээ тушаал дэвшинэ гэдэг тун бэрх байдаг. Нэг бол ажлаа маш сайн хийдэг хүн эсвэл Хэнтий аймгийн угшилтай хүн эсвэл “кран”-тай хүн л тушаал дэвшдэг. Цаг наргүй, цалин багатай, шударга бус тогтолцоотой байхад ийнхүү цалин хасаж, үг дуугарсны төлөө цалин хасаж байгаа нь жирийн алба хаагчид хүнд тусах нь аргагүй юм.
