Мөрийтэй тоглоомын хэргээр ял авсан А.Дэлгэрдалай дахин мөрийтэй тоглоомын хэргээр шүүгдэнэ

Монгол улсын хуулийг уландаа гишгэж, цахим мөрийтэй тоглоом тоглуулсан, мөнгө угаасан, мөрийтэй тоглоом зохион байгуулсан хэрэгт буруутгагдсан А.Дэлгэрдалайг шүүхээс гэм буруутайд тооцож, гэмт хэрэг үйлдэж олсон орлого болох 42 сая төгрөгийг хураах, зургаан сая төгрөгөөр торгох ялыг оногдуулсан талаар бид өмнө нь мэдээлсэн.
Тэгвэл шүүхээс ял авсан А.Дэлгэрдалай үйлдсэн гэмт хэрэгтээ гэмших бус дахин мөрийтэй тоглоомыг цахимаар тоглуулж ашиг олж байсан нь тогтоогдсон тул 2023 оны 09-р сарын 18-нд цагдан хоригдсон. Тэгвэл энэ хэргийн мөрдөн байцаалтын ажиллагаа дуусч хэргийг яллах дүгнэлттэйгээр шүүхэд шилжүүлсэн байна.
Тодруулбал, А.Дэлгэрдалай, Б.Ууганбаяр нарын найман хүн Баянгол дүүргийн нутаг дэвсгэрт нэр бүхий клуб нээж, мөрийтэй тоглоом зохион байгуулсан, мөнгө угаасан гэх хэрэгт холбогдсон байна. Тиймээс А.Дэлгэрдалай нарын намйан хүнд холбогдох хэрэгт Эрүүгийн хуулийн 20.17 дугаар зүйлийн 1 /Мөрийтэй тоглоом зохион байгуулах/, 18.6 дугаар зүйлийн 1 /Мөнгө угаах/-т зааснаар хэргийг шалгаж, яллах дүгнэлт үйлдэн Баянгол дүүргийн Эрүүгийн хэргий анхан шатны шүүхэд хэргийг шилжүүлсэн байна.
Хэргийг шүүхээр шийдэх хүртэл эдгээр мөрийтэй тоглуулдаг этгээдүүдийг гадуур шалгаж байгаа юм.
А.Дэлгэрдалай нар нь цагдаа нарын хамгаалалтад уг гэмт хэргийг үйлддэг байж болзошгүй талаар бид өмнө нь мөн мэдээлж байсан. Энэ асуудлаар мэдээлэх бүрт манай редакци руу А.Дэлгэрдалай гэгч нь залгаж, дарамталж сүрдүүлдэг “уламжлалтай” болсон. Ийнхүү сүрдүүлэхийн зэрэгцээ А.Дэлгэрдалай нар нь хуулийн цоорхой ашиглан “ял наймаалцсан” байж болзошгүй нөхцөл байдлаар өмнөх гэмт хэрэгтээ торгуулах ял аваад салсан түүхтэй. Хэдэн тэрбумын орлоготой хүн ЗУРГААН сая төгрөгөөр торгуулаад өнгөрнө гэдэг хэдийгээр зүй бус ч шүүх хуульд заасны дагуу ял оноогоод өнгөрсөн нь ийнхүү А.Дэлгэрдалай нарт үйлдсэн гэмт хэрэгтээ гэмших бус дахин тоглуулах үндэслэл болсон гэдгийг хуульчид хэлж байв.
Иймд бид А.Дэлгэрдалай нарын хэргийг шүүх хэрхэн шийдсэн талаар эргэж мэдээлсээр байх болно.