“Голомт” банканд хадгаламж эзэмшдэг, түүндээ их хэмжээний мөнгөтэй хүмүүсийн дансанд халдсан залууг ЭЦА-ныхан илрүүлэн шалгаж байна.
Тэрбээр “Social pay” аппликэйшний эмзэг байдлыг олж мэдээд, түүнийгээ ашиглан “Голомт”-ын харилцагчдын нэр дээр данснаас нэг бус удаагийн гүйлгээгээр гурван хүний 30 гаруй сая төгрөгийг нь луйвардсан аж.
Тэрбээр энэ хэргээ үйлдэхээс өмнө ХААН банкны цахим үйлчилгээний аюулгүй байдалд хяналт шалгалт хийж байхдаа Худалдаа, хөгжлийн, Хас, “Голомт” зэрэг арилжааны банкнуудын нэвтрүүлсэн аппликэйшнүүдийг бас нягтлах үедээ уг эмзэг байдлыг нь олж тогтоон хакердсан гэх мэдээлэл эх сурвалжууд өгч буй юм.
Харин “Голомт”, ХААН банкны олон нийттэй харилцах албаныхан эл мэдээллийг эрс үгүйсгэж, “Олон нийтийн сүлжээнд ташаа мэдээлэл яваад байгаа” хэмээсэн юм.
Баталгаатай эх сурвалжуудаас авсан мэдээллээр 2022 онд ХААН банкны Мэдээллийн аюулгүй байдлын газарт мэдээлэл технологийн ажилтнаар томилогдон ажиллаж буй Т.Мөнхболд гэх 28 настай залуу эл хэргийг үйлдсэнээ хүлээж, “Голомт” банкны харилцагч, хадгаламж эзэмшигчдийн данснаас луйвардсан мөнгөөрөө хувьдаа зарцуулахаар хадгалж байснаа мэдүүлсэн гэнэ.
Тэрбээр эхлээд “Голомт” банкны хадгаламж эзэмшигч Т-гийн данснаас 14 сая гаруй төгрөг анх шилжүүлэн авсан бөгөөд дараа нь Э-ынхаас 10 орчим, Б-гийнхаас 15 сая гэх байдлаар авсан нь тодорхой болсон аж.
