БТЗ хувь нийлүүлсэн нийгэмлэгийн Дотоод аудит, хяналт шалгалтын албаны дарга Ж.Пунцагийг 2022 онд АТГ-аас саатуулж, мөрдөн шалгах үйл ажиллагаа явуулж эхэлсэн.Улмаар түүнд холбогдох хэргийг мөрдөн шалгаж, прокуророос Эрүүгийн хуулийн 22.1-1 дэх хэсэгт зааснаар яллах дүгнэлт үйлдэж, хэргийг шүүхэд шилжүүлсэн ч 2023.02.27-ны өдөр Чингэлтэй дүүргийн Эрүүгийн хэргийн анхан шатны шүүхээс хэргийг мөрдөн байцаалтад буцаасан юм. 
Тэгвэл энэ хэргийн мөрдөн байцаалт дуусч хэргийг дахин шүүхэд шилжүүлжсэн талаар бид өмнө нь мэдээлж байсан. Хэрвээ шүүхээс түүнийг гэм буруутай гэж үзвэл таван жил хүртэл хорих ял оноох юм.
Тодруулбал,
Эрүүгийн хуулийн 22.1 дүгээр зүйл. Эрх мэдэл, албан тушаалын байдлаа урвуулан ашиглах
“1.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.” Гэж заасан.
Ж.Пунцаг нь өмнө нь дөрвөн удаа гэмт хэрэгт холбогдон “ял” авч байсан түүхтэй. Одоогоос 23 жилийн өмнө Өвөрхангай аймгийн Бат-Өлзий суманд хэсгийн төлөөлөгчөөр ажиллаж байхдаа О.Уртнасангийн биед хүнд гэмтэл учруулсан байна. Мөн 2002 онд иргэн Ж.Шижир, Ш.Батнасан, М.Баясгалан нарт зэвсэг хэрэглэн танхайрсан үйлдэлдээ хорих ялаар шийтгүүлж, тэнсэн харгалзаж байсан түүхтэй. Мөн цагдаагийн байгууллагад ажиллаж байх үедээ ЦЕГ-ын даргын 2006.03.24-ний өдрийн №115 тоот тушаалаар “Цагдаагийн байгууллагын гүйцэтгэх ажлын тухай нууцыг задруулсан” гэх үндэслэлээр цагдаагийн ахлах дэслэгч цолоо хураалгасан бараан түүхтэй. Үүнээс гадна Иргэний харьяалал, шилжилт хөдөлгөөний ерөнхий газрын хяналт шалгалтын улсын ахлах байцаагчаар ажиллаж байхдаа 2014 онд “Си Ар Си Жи девеломент Монголиа” ХХК-ийн орлогч захирал Жан Юү Шингээс таван сая төгрөгийг орчуулагч Жя Рун Лингээр дамжуулан авсан, мөн бизнес ангиллын визээр Монгол Улсад зорчин ирсэн боловч ажил эрхэлж байгаад визний хугацаа хэтрүүлсэн 14 хятад иргэнийг дахин хил нэвтрэх эрхтэйгээр нутаг буцаасан тул 2015 оны 01 сарын 19 өдөр 1.6 жил хорих ял ногдуулжээ.Улмаар Давж заалдах шатны шүүхээр тус ялыг нь тэнсэн харгалзаж, цагдаагийн хяналтанд хоёр жилийн хугацаатай байлгах шийдвэр гаргасан байна.
Түүний хувьд өнгөрсөн хугацаанд огцом баяжсан гэх бөгөөд 2016.10.20-нд УБТЗ-ын дарга агсан Д.Жигжиднямаа Дотоод аудит, хяналтын албаны даргаар томилсонтой нь холбоотой гэх яриа байдаг.
Бид Ж.Пунцагийн хахуулийн хэргийн талаар эргэж мэдээлэх болно.
