МХЕГ-ын Экспорт, импорт, хилийн хорио цээрийн хяналтын газрын дарга Э.Аззаяа, хэлтсийн дарга Н.Баярсайхан тэргүүтэй хүмүүст холбогдох хэргийг Улсын дээд шүүх хэлэлцэн, Э.Аззаяад хөнгөн ял оноосон хэмээн анхан шатны шүүхээр түүнд холбогдох үйлдлийг нь дахин хэлэлцүүлэхээр болоод байна.
АТГ-ын мөрдөгчид МХЕГ-ын байрны 432 тоот буюу Н.Баярсайханы албан өрөөнд 2017 оны арванхоёрдугаар сарын 7-нд нэгжлэг хийсэн бичлэгийг хүмүүс санаж буй нь лавтай. Түүний оймсноос боодолтой гадаад валют, мөнгөн дэвсгэрт гарсан билээ. 100-тын америк долларын хуучин шар дэвсгэрт 11, шинэ 100-тын дэвсгэрт 75 ширхэг байсан аж. Хүрэмнийх нь халаасанд 10 000 төгрөгийн дэвсгэрт 30, 20 000 төгрөгийн дэвсгэрт 25 нийт 800 000 төгрөг байсныг бас хураан авчээ. Өөрөөр хэлбэл, ажлын өрөөнөөс нь нийт 8600 ам.доллар, 10.8 сая төгрөг битүүмжилсэн түүхтэй.
Маргааш нь Хан-Уул дүүргийн XV хорооны нутаг дахь Н.Баярсайханы гэрт нэгжлэг хийгээд төмөр шүүгээ (сейф)-нээс хоёр гялгар тортой 20 000 төгрөгийн дэвсгэртүүд хураасан. Шүүх хурлын тэмдэглэлд дурдсанаар, нийт 64 боодол мөнгө байж. Мөн тэр шүүгээнд цаасанд боодолтой 20 000 төгрөгийн дэвсгэрт зургаан боодол, нийт 12 сая төгрөг байв. 100-тын дэвсгэртээр гурван боодол буюу 3000 ширхэг ам.доллар, нэг боодол юань цаасанд боодолтой байлаа. Хэтэвчнээс нь 100-тын есөн боодол буюу 900 ширхэг ам.доллар, юань 400 ширхэг, задгайгаар 100-тын дэвсгэртээр 63, 50-тын дэвсгэртээр дөрөв, 20-тын дэвсгэртээр 18, 10-тын дэвсгэртээр 21, 5-тын дэвсгэртээр найм, 1-тийн дэвсгэрт долоо ширхэг, нийт 7117 ам.доллар хураан авав” гэжээ. Н.Баярсайханы гэрийн зочны өрөөнөөс 16 460 ам.доллар, 5.1 сая төгрөг, унтлагын өрөөнөөс 17.5 сая төгрөг гарсан юм байна. Харин дээрх сейфнээс 127 117 ам.доллар, 140 сая төгрөг, 50 000 юань гарч байсан.
Харин Э.Аззаяагийн өмчлөлийн Хан-Уул дүүргийн XV хороон дахь орон сууцаас 57.4 сая төгрөг, 20 000 юань хураан авсан.
Гэмт хэргийн замаар олсон нийт 230.8 сая төгрөг, 152 177 ам.доллар, 70 000 юанийг Эрүүгийн хуулийн ерөнхий ангийн 7.5 дахь хэсэгт зааснаар улсын төсөвт шилжүүлэхээр Чингэлтэй дүүргийн Эрүүгийн хэргийн анхан шатны шүүхээс шийдвэрлэсэн билээ.
