НҮБ-ын ХХААБ-ын Ерөнхий захирал Др. Чу Донюүг Улсын Их Хурлын гишүүн, Засгийн газрын гишүүн, Хүнс, хөдөө аж ахуй, хөнгөн үйлдвэрийн сайд Ж.Энхбаяр хүлээн авч уулзлаа.
Хоёр тал хүнс, хөдөө аж ахуй, хөдөөгийн хөгжлийн талаар санал солилцож, хоёр болон олон талт хамтын ажиллагааг эрчимжүүлэхээр санал нэгдэв. ХХААБ-ын зүгээс “Нэг улс – Нэг бүтээгдэхүүн” санаачилгыг хэрэгжүүлж, хүнсний чанар, хангамжийн асуудлыг шийдвэрлэн олон улсын зах зээлд нийлүүлэх арга хэмжээг дэмжиж буйгаа мэдэгдсэн бөгөөд хоёр тал “Нэг аймаг – Нэг бүтээгдэхүүн” санаачилгыг Монгол Улсад хэрэгжүүлэх боломжийг эрэлхийлэхээр тохиролцов.
Хоёр талын уулзалтын хүрээнд Монгол Улсын Хүнс, хөдөө аж ахуй, хөнгөн үйлдвэрийн яам, НҮБ-ын ХХААБ-ын Монгол Улс дахь Суурин төлөөлөгчийн газар хооронд дараах баримт бичиг гарын үсэг зурав. Үүнд:
1. “Гараас гарт” санаачлагын хүрээнд Монгол Улсад хүнс, хөдөө аж ахуйн шилжилтийн явцад баримт тулгуурласан инновацыг нэвтрүүлэх, хөрөнгө оруулах тухай;
2. Бэлчээрийн мал аж ахуй эрхлэгчдийн тэсвэртэй байдлыг сайжруулах, Монгол Улсад ирээдүйд учирч болзошгүй гамшгаас үүдэлтэй эмзэг байдлыг багасгах техникийн хамтын ажиллагааны хөтөлбөрүүдийг хэрэгжүүлэхээр болов.
