Эрдэнэт үйлдвэрт дэлбэрэлт болж нэг хүний эрүүл мэндээрээ хохирсон хэрэг 2024.09.11-ны өдөр гарсан байна. Тодруулбал, “Эрдэнэт үйлдвэр” ТӨҮГ-ын Ус хангамжийн цех, цэвэрлэх байгууламжийн хэсгийн хлораторын станцад дэлбэрэлт болж 37 настай эмэгтэй А хүнд бэртэж эмнэлэгт хүргэгджээ. Одоогоор биеийн байдал хүнд, баруун талын гар, хөл, нүүр хэсэг химийн бодист /хлоратор/ түлэгдэж гүнзгий шарх үүссэн. Амьсгалын зам руу химийн бодис орсон байж болзошгүй байгаа юм.
Цагдаагийн байгууллагад энэ хэргийн дуудлага мэдээлэл бүртгэгдсэн бөгөөд өдгөө хэргийг шалгаж байгаа аж.
Харин хэргийн талаар “Эрдэнэт үйлдвэр” ТӨҮГ-ын шалгалтын хариу гартал мэдээлэл өгөхгүй гэв.
Бид энэ талаар эргэж мэдээлсээр байх болно.
