Төрийн өмчит болон төрийн өмчийн оролцоотой аж ахуйн нэгж, байгууллагын албан тушаалтнуудаас хахууль авч тусгай зөвшөөрөл олгож байсан албан тушаалтны хэргийг АТГ-ын Мөрдөн шалгах хэлтсийнхэн шалгаж дуусжээ.
Тодруулбал, Төрийн өмчийн бодлого, зохицуулалтын газар (ТӨБЗГ)-ын Төрийн өмчийн бүртгэл, хяналтын хэлтсийн мэргэжилтэн Э.Дуламсүрэнг хууль зөрчин гэрчилгээ гарган олгож, удаа дараа хахууль авсан гэж буруутгаж буй аж. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 53.2-т “Худалдан авах ажиллагааны асуудал хариуцсан төрийн захиргааны байгууллага сургалтад хамрагдсан иргэнээс шалгалт авч, худалдан авах ажиллагааны мэргэшсэн ажилтны гэрчилгээ олгоно” гэж заасан.
Энэ заалтыг үндэслэн Төрийн банк, “ДЦС-4” ХК, ХНХЯ-ны харьяа Ахмад настны үндэсний төв, СЭМҮТ зэрэг байгууллагын санхүүгийн албаны ажилтнуудад хууль бусаар сертификат олгосон гэнэ. Уг нь Төрийн худалдан авах ажиллагааны газраас худалдан авах ажиллагааны мэргэшсэн ажилтан бэлтгэх сургалтыг зохион байгуулж, сертификат олгодог юм байна. Гэтэл дээр дурдсан байгууллагуудын санхүүгийн албаны ажилтнууд тендерийн үнэлгээний хороонд орж, өөрсдөдөө болон хамаарал бүхий хүмүүстээ давуу байдал бий болгох гэсэн ашиг сонирхлын үүднээс үү, хууль зөрчин ТӨБЗГ-ын мэргэжилтэн Э.Дуламсүрэнд садан төрлийнх нь хүний дансыг ашиглан багахан хэмжээний мөнгө өгөөд уг сертификатыг гаргуулан авдаг байжээ. Бидний авсан мэдээллээр Төрийн банкны салбарын нярав Ө.Баянмөнх, “ДЦС-4” ХК-ийн инженер Д.Гантогтох, ХНХЯ-ны харьяа Ахмад настны үндэсний төвийн нягтлан бодогч С.Нэргүй, СЭМҮТ-ийн Поликлиникийн эрхлэгч Д.Дэжидмаа нарыг ТӨБЗГ-ын мэргэжилтэнд хахууль өгч гэрчилгээ гаргуулж авсан хэмээн буруутган шалгасан бөгөөд өөр нэг бус хүн уг гэрчилгээг авсан байж болзошгүй аж.
АТГ-ын Мөрдөн шалгах хэлтсийнхэн өнгөрсөн долоо хоногт 17 хэрэгт яллах дүгнэлт үйлдүүлж шүүхэд шилжүүлэх саналаа илэрхийлэн прокурорын хяналтад хүргүүлсэн. Тэдгээрийн дотор дээрх албан тушаалтнуудын хэрэгт багтсан юм.
