Зэвсэгт хүчний жанжин штаб (ЗХЖШ)-ын I орлогч даргаар ажиллаж байгаад 2021 оны есдүгээр сард чөлөөлөгдсөн бригадын генерал Ц.Жавхланбаатарын хахуулийн хэргийг Баянзүрх дүүргийн эрүүгийн хэргийн анхан шатны шүүхэд өнөөдөр хэлэлцэх гэж байна. Урьдчилсан хэлэлцүүлгээр гэм буруугийн хурлыг товлох эсвэл хэргийг мөрдөн байцаалтад буцаах эсэхийг шийдэх юм.
Хэргийг эргэн сануулахад, Ц.Жавхланбаатар Зэвсэгт хүчний Хуурай замын цэргийн командлалын Ажиллагааны дэмжлэгийн хэлтсийн даргаар ажиллаж байхдаа дэд ахлагч Т.Г-г Афганистанд олон улсын цэргийн эвслээс явуулж асан “Шийдвэртэй дэмжлэг” ажиллагааны ХБНГУ-ын зэвсэгт хүчинтэй хамтран үүрэг гүйцэтгэх XI ээлжийн цэргийн багт багтаасныхаа “төлбөрт” 4.5 сая төгрөг бусдаар дамжуулан авсан хэмээн буруутгагдаж байгаа юм. Ерөнхийлөгч Х.Баттулгын зарлигаар 2021 оны хавар бригадын генерал цол хүртсэн түүнд прокуророос Эрүүгийн хуулийн 22.4 дүгээр зүйлийн “Нийтийн албан тушаалтан хахууль авсан” хэмээн яллах дүгнэлт үйлдсэн аж.
Бригадын генерал Ц.Жавхланбаатарийн хувьд үүнээс өмнө нь мөн хэд хэдэн гэмт хэрэгт холбогдсон юм. Тодруулбал,
- Х.Баттулгыг ерөнхийлөгч байхад түүний зарлигаар ЗХЖШ-ын орлогч даргаар томилогдохоосоо өмнө тэрбээр Зэвсэгт хүчний Хуурай замын цэргийн командлалын хэлтсийн даргаар хурандаа цолтой ажиллаж байхдаа бусдаас хахууль авсан, эд хөрөнгө залилсан хэрэгт холбогдон цагдаа, АТГ-ын үүдийг сахиж байсан юм. Тодруулбал, зэвсэгт хүчний 284 дүгээр ангийн ахлагч Б.Т-ыг энхийг сахиулах ажиллагааны цэргийн багт багтаана хэмээн 2018 оны гуравдугаар сард 3.5 сая төгрөг авсан боловч явуулаагүй хэмээн ар гэрийнхэн нь гомдол гаргасны дагуу шалгаад яллагдагчаар тооцон 2019 оны аравдугаар сард эрүүгийн хэргийг шүүхэд шилжүүлэн шийдвэрлүүлэх санал гарган прокурорын хяналтад шилжүүлж байв. Гэвч тухайн үед прокурор хэргийг хэрэгсэхгүй болгох тогтоол гаргасан юм.
- Мөн Ц.Жавхланбаатар Сонгинохайрхан дүүргийн Цагдаагийн II хэлтэст Эрүүгийн хуулийн 17.3-т заасан бусдаас их хэмжээний мөнгө залилан мэхэлсэн хэрэгт шалгуулсан. Мөн л энхийг сахиулах ажиллагаанд явуулж өгнө хэмээн 10 сая төгрөг залилан мэхэлсэн байж болзошгүй хэмээн цагдаагийнхан шалгаж байхад нь прокурор хэргийг хэрэгсэхгүй болгосон байдаг.
- Үүнээс гадна тэрбээр Баянзүрх дүүргийн 25 дугаар хорооны нутаг дэвсгэр дахь гэртээ агсам тавьж, эхнэрийгээ ална хэмээн хутга барин дайрчээ. Улмаар Баянзүрх дүүргийн Цагдаагийн газрын I хэлтсийнхэн дуудлагын дагуу очиж түүнийг Эрүүлжүүлэх байрандаа саатуулсан аж. Маргааш нь түүнд Зөрчлийн тухай хуулийн 6.20-7 дахь хэсгийн “Хүүхдийн бие махбодод халдсан, эсхүл үл хайхарсан, эсхүл хүүхдийн дэргэд архидан согтуурсан, мансуурсан, хүчирхийлэл үйлдсэн нь эрүүгийн хариуцлага хүлээлгэхээргүй бол хүнийг гурван зуун нэгжтэй тэнцэх хэмжээний төгрөгөөр торгоно” гэх үндэслэлээр зөрчлийн хэрэг нээн шалгасан байна.
Удаа дараа гэмт хэрэгт холбогдож байсан бригадын генерал Ц.Жавхланбаатартай хамт Ж.Даваажаргал гэгч яллагдагчаар татагдан өнөөдөр хамт шүүгдэгч болоод байна. Шүүхээс хэргийг хэрхэн шийдсэн талаар бид эргэж мэдээлэх болно.
А.Баярмаа
