“Говийн гайхамшигт амьтдын амьдрах орчин ба усан хангамж уулзалт хэлэлцүүлэг-2024” болж тус хэлэлцүүлгээр говийн зэрлэг амьтад хавтгай, мазаалай, тахь, хулан, монгол бөхөн, хар сүүлтийн амьдрах орчны талаар эрдэмтэн судлаачид судалгаагаа танилцуулжээ.
2016 оны тооллогоор улсын хэмжээнд 22 мазаалай байсан бол 2018 онд 36 болж харин 2024 оны байдлаар мазаалайн тоо толгой 51-д хүржээ.
Мазаалайн тоо толгой хэт цөөн учраас байгальд өөрийн гүйцэтгэх үүрэггүй болсон байх магадлалтай гэж үзэж байжээ. Гэтэл мазаалай говийн баян бүрдүүдийг нөхөн сэргээдэг хармагийг ургуулдаг амьтан болохыг сүүлийн үеийн судалгаагаар нотолсон байна.
Байгальд унасан хармагийн үрийн ургах чадамж 10-15 хувьтай байдаг бөгөөд үүнийг мазаалай идээд ходоодоороо боловсруулаад гаргасан тохиолдолд 50 хувиас дээш ургах боломжтой. Тэгэхээр мазаалай амьдрах орчноо өөрөө бүтээдэг гэж “Говийн гайхамшигт амьтад” ТББ-ын тэргүүн Г.Довчиндорж онцоллоо.
Мазаалай идэш тэжээлийнхээ 77 хувийг ургамлаас, үлдсэн 23 хувийг амьтны гаралтай бүтээгдэхүүнээс авдаг байна.
