Чингэлтэй дүүрэг, Япон улсын Эрүүл хотуудыг дэмжих ашгийн бус байгууллага болон Японы Олон улсын хамтын ажиллагааны байгууллагатай хамтран 2022-2025 онд хэрэгжүүлж буй дүүргийн Ерөнхий боловсролын 37, 50 дугаар сургуулийн сурагчдад шүдний үзлэг хийх төслийн үр дүнг хэлэлцэх уулзалт 2024 оны 08 дугаар сарын 05-ны өдрөөс 9-ний өдрүүдэд Япон улсад зохион байгуулагдлаа.
Уулзалтад Чингэлтэй дүүргийн төслийн багийн төлөөлөл болон Япон Улсын Эрүүл хотуудыг дэмжигч ашгийн бус байгууллагын ерөнхийлөгч, доктор, ноён Мицуюуки Чиба, Японы “Эрүүл хотуудыг дэмжигч” ашгийн бус байгууллагын зөвлөх Инагаки Томиказү, зөвлөх эмч доктор Фүжино Мурашигэ, доктор Хасэгава Масару, доктор Мидорикава Шизүо нар оролцож, төслийн хэрэгжилтийг хангалттай сайн гэж дүгнэлээ.
Мөн энэ үеэр төслийн багийн гишүүд Япон улсын Парламентийн гишүүн, Монгол Улсын парламентийн гишүүдийн холбооны Ерөнхийлөгч, Хаяши Микио, Япон улсад суугаа Монгол улсын Элчин сайд Б.Баярсайхан нартай уулзсан ба “Шүдний эрүүл ахуйн тогтолцоог нэвтрүүлэх төсөл”-ийг Чингэлтэй дүүрэг үр дүнтэй хэрэгжүүлснийг онцлоод, цаашид нийслэлийн 20 сургууль, 2 аймагт хэрэгжүүлэхээр тохиролцож, төслийг хэрэгжүүлэхэд шаардагдах 1 тэрбум иены санхүүжилтийг Жайка Олон улсын байгууллагаар шийдвэрлүүлэх хүсэлтийг уламжлахаар харилцан зөвшилцөлд хүрсэн юм.
