Төрийн банканд харилцагч, хадгаламж эзэмшигчдийн байршуулсан мөнгөнөөс хуурамч бичиг баримт үйлдэн их хэмжээгээр завшиж байсан гэх хэрэгт холбогдсон албан тушаалтнуудыг ЭЦА-ныхан 2018 оны аравдугаар сарын сүүлчээр шалгаж эхэлсэн талаар бид цаг тухайд нь мэдээлсэн. Гэвч энэ хэрэг өнөөдрийг хүртэл шүүхээр эцэслэн шийдэгдээгүй байна. Тодруулбал, Ч.Ариунгэрэл С.Аптанчимэг Б.Нарантунгалаг Б.Мөнхсүрэн Д.Батчулуун Б.Бат-Эрдэнэ, Я.Билэгдэмбэрэл, Г.Сайнбаяр, А.Мөнхбат нарт холбогдох хэрэг Сүхбаатар дүүргийн эрүүгийн хэргийн анхан шатны шүүхэд өчигдөр \2024.12.23\ товлогдсон байсан ч шүүгчдэгчийн өмгөөлөгчтэй оролцох хүсэлтийн улмаас хойшилсон байна.
Хэргийг эргэн сануулахад, Төрийн банкны Тээврийн товчоон дахь салбарын захирал Ч.Ариунгэрэл, ахлах теллер С.Алтанчимэг, VIP теллер Б.Мөнхсүрэн нар хуйвалдан хадгаламж эзэмшигчдийн дансны мэдээлэлд нэвтрэн их хэмжээний мөнгөтэйг нь мэдээд хуурамч баримт бүрдүүлэн зээл авсан хэрэгт холбогдоод буй. Тэд 2018 оны тавдугаар сарын 29-нөөс хойш 44 иргэний нэр дээр хоёр тэрбум гаруй төгрөгийн, 70 зээлдэгчийн нэр дээр 2.7 тэрбум төгрөгийн үлдэгдэлтэй зээл гаргаж банкандаа их хэмжээний хохирол учруулсан хэмээн буруутгагдсан. Банкаар тогтмол үйлчлүүлдэггүй, эсвэл өндөр настай, хадгаламждаа их хэмжээний мөнгөтэй иргэдийн мэдээллийг албан тушаалаа ашиглан судалж, мөнгийг нь барьцаалан зээл авч, хүүний төлөлт нэртэйгээр шилжүүлэн завшсан нь тогтоогдсон гэдэг.
Тэдэнд эрүүгийн хуулийн 22.1-2 Эрх мэдэл, албан тушаалын байдлаа урвуулан ашиглах
17.3-2.1, 2.2 Залилах
21.10-2 Битүүмжилсэн, хураан авсан эд хөрөнгийг завших, үрэгдүүлэх зүйл ангиудаар буруутгаад байгаа юм.
Бид энэ хэргийн талаар эргэж мэдээлсээр байх болно.
