Шүүх нээлттэй болж байгаа. Энэ ажлын хүрээнд шүүхийн шийдвэр нээлттэй болж, мэдээллийн нэгдсэн санд байрших болсон.
Шүүх нээлттэй болох ажил шат дараатай хийдсээр байгаа бөгөөд энэ жилээс эхлэн төрийн нууц болон хүчингийн хэргээс бусад хэргийн нээлттэй шүүх хурлын шийдвэр албажин гарсны дараагаар шүүх хурлын бичлэгүүд шүүхүүдийн албан ёсны сайтад байршиж байгаа. Улмаар гурван өдрийн дараа устах болсон. Мөн авлига, албан тушаалын хэргийн шүүх хурал шүүхийн албан ёсны цахим хуудсаар шууд дамжуулалт хийгдэх болсон билээ.
Уг ажлын хүрээнд анхан болон давж заалдах шатны шүүхүүд байгаа нөөц боломжоо ашиглан ачааллаа эрс нэмж хэмжээндээ л хичээж байгаа.
Гэвч шүүхүүдэд сүүлийн хэдэн жил цалингаас өөр санхүүжилт олгоогүй тул шүүх хурлын бичлэг шаардлага хангахгүй, дуу дүрсний чанар муу байгаагаас болж шүүх хангалттай хэмжээнд нээлттэй болж чадахгүй байна. Тухайлбал, анхан шатны шүүхүүдийн камерын бичлэгийн чанар муу, зарим танхим дахь микрофон нь тааруу тул шүүхийн бичлэг тун тааруу байна. Нийслэлийн эрүүгийн хэргийн давж заалдах шатны шүүхийн бичлэг нь интернэтийн асуудлаас болж мөн л гацаж байгаа юм.
Тухайлбал, Нийслэлийн эрүүгийн хэргийн давж заалдах шатны шүүхэд 2025.02.26-ны өдөр болсон Ж.Пунцаг, З.Үнэнбат нарт холбогдох эрүүгийн хэргийн шүүх хуралдааны шууд дамжуулалтын бичлэгийн чанар сайн байгаа ч интернэтийн хурдаас болж маш их гацаж байгааг дараах линкээс үзэж болохоор байна.
https://www.facebook.com/ccitycourtofappeals/videos/1181115266884226/
Өөрөөр хэлбэл Шүүхийн ерөнхий зөвлөлөөс бодлогоор нээлттэй болгох ажлыг хийсэн ч техникийн асуудлыг нь шийдэж өгөөгүйн улмаас санаачилсан ажил нь үндсэндээ бүтэлгүйтэж байна.
Уг нь авлига албан тушаалын хэргүүд нээлттэй болсноор олон нийтийн хууль эрх зүйн мэдлэг дээшилж байгаа давуу тал ажиглагдаж байна. Нөгөө талаас шүүх зөвхөн хуульдаа захирагдаж шийдвэр гаргаж байгааг олон нийт харж, шүүхийн нэр хүнд өсөж байгаа.
Шүүхийн ачаалал асар их байгаа ч нээлттэй шүүх хурлын шууд дамжуулалт болон бичлэгийг цахимд байршуулах ажил энэ оны эхний өдрөөс хэрэгжиж байгаа. Өнөөдөр гуравдугаар сар гэхээр уг нь өдийд шүүх хурлын бичлэгтэй холбоотой асуудал жигдрэх замдаа орсон байх учиртай. Гэвч шүүхийн ерөнхий зөвлөл нь микрофон, камерын чанар, интернэтийн хурд мэт “тогооны” асуудлаа шийдэж чадахгүй байгаа нь ажлаа тааруу хийж байгаагийн илрэл байж болзошгүй. Шүүхүүдийн тамгын газраас уг асуудлаа шийдвэрлүүлэхээр ханддаг ч асуудлыг шийдэж өгдөггүй нь ийнхүү нээлттэй шүүх нь хангалттай хэмжээнд хэрэгжиж чадахгүйд хүрч байгаа юм. Иймд Шүүхийн ерөнхий зөвлөл санаачилсан ажилдаа хариуцлагатай хандаж, асуудлуудыг түргэн шуурхай шийдэхэд анхаарна биз ээ!!!
А.Баярмаа
