Хүний амьдралд шалдаа бууж шантрах, шагшигдаж магтагдах өдөр бишгүйдээ л их. Амьдрал хэмээх их мөрөнд алдахгүй гэж хичээж зүтгэсээр амьдарч ч амжихгүй байгаа мэт таньд санагдаж байсан уу. Бүх зүйл хэцүү санагдаж бууж өгмөөр мэдрэмж авч байна уу? Тийм бол та эргэлзэх зүйлгүй амжиж “Амьдрахуй” постдрамын жүжгийг зорин очиж үзээрэй.
“Ядуу зүдүү ч бай амьд явах, амьдрах л аз жаргал юм” гэдгийг “Амьдралд үхэх биш амьдрах зориг хэрэгтэй”-г театрын урлагаар дамжуулан та бүхэнд “Орфей” театрын хамт олон хүргэх болно.
Тус жүжгийн найруулагчаар Мягмарнарангийн Батболд, продюсераар Т.Ариунчимэг ажиллаж гол дүрүүдэд гавъяат Д.Баттөмөр, Д.Ганцэцэг, залуу жүжигчин Г.Отгонбат, Б.Должинсүрэн, дүрүүдэд ардын жүжигчин Г.Мягмарнаран, гавъяат жүжигчин Ц.Төмөрбаатар, Б.Нармандах нар ажиллажээ. Үүнээс “Банш Батаа” хэмээн олон түмнээ хайрлагдсан уран бүтээлчийг шинэ өнгө төрхөөр харах гайхам сайхан байлаа. Бид түүнийг зөвхөн хошин шогийн жүжигчнээр л мэдэх ч тэр “Амьдрахуй”-н амин сүнс нь болж авъяасаараа бахдан байлаа.
“Орфей” театр Хятадын зохиолч Үй Хуагийн “Амьдрахуй” туужаас сэдэвлэсэн “Амьдрахуй” постдрамын жүжиг дөрөвдүгээр сарын 3-ныг хүртэл гуравхан удаа тоглоод хаах гэнэ. Та бүхэн зорин очиж амьдралын үнэ цэнэ, амьдрахын жаргалыг мэдэрч, тухлан морилохыг урья.
Мөн Монгол жүжиг анх удаа гадны улсад франчайз эрхээр зарагдах бүтээл болжээ. Үй Хуагийн “Амьдрахуй” романаас сэдэвлэсэн “Орфей” театрын бүтээл “Амьдрахуй” драмын жүжгийг олон улсын франчайз эрхээр ОХУ-ын БНТУ-ын Кызыл хотын үндэсний их театр худалдан авахаар болсон байна.
“Амьдрахуй” драмын жүжиг Мягмаранарангийн Батболдын найруулгаар 2024 онд нийт 15 мянган үзэгчид хүрсэн бөгөөд театрын урлагийн мэргэжлийн судлаач, шүүмжлэгчид болон үзэгчдээс өндөр үнэлгээ хүртсэн билээ.
Б.Мөнхжаргал
