Хүний эрхийн Үндэсний Комисс нь Үндсэн хууль, хууль, олон улсын гэрээнд заасан хүний эрх, эрх чөлөөний хэрэгжилтэд хяналт тавьж, хүний эрхийг хамгаалах, дэмжих чиг үүрэг бүхий хараат бус, бие даасан үндэсний байгууллага юм.
Гэвч хүний эрхийг хамгаалах энэ байгууллага өнөөдөр өөрөө хүний эрхийг хамгаалах чадамжгүй болжээ. Энэ талаар тус байгууллагад ажиллаж байгаа болон тус байгууллагаас гарсан эх сурвалжууд батлан ярьж байна. Тухайлбал, ХЭҮК-ын дарга Б.Сүнжидийн дарамт, шахалт их байгаагаас ажлаа өгсөн хүн цөөнгүй байгаа бөгөөд ажлаа өгсөн оронд чадамжгүй хүмүүс ирсэн нь тус байгууллагын ажлыг алж байгаа аж. Үүгээр ч зогсохгүй Б.Сүнжид өөрийнх нь үгэнд ороогүй хүмүүсийг ямар нэг аргаар дарамталж байгаа гэх мэдээлэл байна.
Тухайлбал, Б.Сүнжидийг ХЭҮК-ийн дарга болсноор түүний “дарамт”-д өртсөн ХЭҮК-ын Захиргаа, удирдлагын хэлтсийн даргаар ажиллаж байсан хууль зүйн ухааны доктор Ш.Үнэнтөгс Эрүү шүүлтээс урьдчилан сэргийлэх хэлтсийн дарга болон шилжсэн байх юм.
Б.Сүнжидийн дарамтад одоо хамгийн ихээр өртөж байгаа хүн нь ХЭҮК-ын Тамгын газрын дарга Ц.Адъяахишиг юм. Тэрбээр даргынхаа хууль бус байж болзошгүй төсвийн хөрөнгийг зүй бусаар зарцуулах гэж буй үйлдлүүдийг таслан зогсоосныхоо төлөө нүүр рүүгээ эд зүйлс шидүүлсэн гэнэ. Үүгээр ч зогсохгүй Б.Сүнжид “ажлаа өг, өгөхгүй бол… ” гэх зэргээр элдвээр дарамталдаг талаар тус байгууллагад ажилладаг албан эх сурвалжууд батлан ярьсаар байна.
Б.Сүнжид үгэнд нь ороогүй Ц.Адъяахишигт сахилгын шийтгэл оногдуулсан байх юм.
Үүнийг нь эсэргүүцэн ХЭҮК-ын Тамгын газрын дарга Ц.Адъяахишиг Төрийн албаны зөвлөлд ханджээ. Өөрөөр хэлбэл хүний эрхийг хамгаалах байгууллагын ажилтан нь даргынхаа дарамтад өртөж байгаагаа, эрх нь зөрчигдөж байгаа тухайгаа өргөдөл бичиж Төрийн албаны зөвлөлд хандаж “шүгэл үлээж” байгаа юм.
ХЭҮК-ын дарга Б.Сүнжидтэй холбоотой Ц.Адъяахишигээс ирсэн өргөдлийг Төрийн албаны зөвлөл шалгаж байгаа гэх мэдээлэл байна. Хэрвээ сахилгын шийтгэл оногдуулсан нь буруу бол Б.Сүнжид ажил албандаа тэнцэхгүй нэгэн гэдэг нь нотлогдох юм.
Бид энэ асуудлаар эргэж мэдээлсээр байх болно.
А.Баярмаа
