Тэгвэл зохион байгуулалттайгаар их хэмжээний валютыг Монгол Улсын хилээр тогтмол гаргадаг байсан бүлэг этгээдүүдийг тагнуулын байгууллагын зүгээс 2025 оны 11 дүгээр сарын 06-ны өдөр саатуулсан байна. Тодруулбал эдгээр бүлэг этгээдүүд нь нэг удаадаа 2-3 сая ам.долларыг Монгол Улсын хилээр авч гардаг байсан гэх бөгөөд өнгөрсөн хугацаанд 700 тэрбум гаруй төгрөгтэй тэнцэхүйц хэмжээний валютыг авч гарсныг урьдчилсан байдлаар тогтоосон байна. Энэ их хэмжээний мөнгийг бэлнээр гаргах нь манай улсын эдийн засгийн аюулгүй байдалд сөргөөр нөлөөлөхөөс гадна төгрөгийн ханш сулрахад нөлөөлсөн гэж үзэн тагнуулын байгууллагаас мөрдөн шалгах ажиллагааг хэрэгжүүлж байгаа бололтой. Сонирхуулахад, сүүлийн өдрүүдэд ам.долларын ханш тогтмол буурч байгаа нь дээрх мэдээлэлтэй холбоотой байхыг үгүйсгэхгүй юм. Гаалийн байгууллагын “Зорчигчийн хувийн хэрэглээний эд зүйлийг гаалийн хилээр нэвтрүүлэх журам”-ын дагуу мэдүүлж нэвтрүүлдэг. Ашиг хийх зорилгоор их хэмжээний мөнгө авч гарч байгаа нь дээрх журмыг зөрчөөд зогсохгүй ашиг хийхээр авч гарсан бол ББСБ болон виртуал хөрөнгийн үйлчилгээг зөвшөөрөлгүй эрхэлсэнд тооцогдох юм.
