БХЭШХ-Г ЦЭРГИЙН ГАВЬЯАНЫ УЛААН ТУГИЙН ОДОНГООР ШАГНАВ

Батлан хамгаалах яамны харьяа “Батлан хамгаалахын эрдэм шинжилгээний хүрээлэн”-г Цэргийн гавьяаны улаан тугийн одонгоор шагналаа.

Энэхүү ёслолын үйл ажиллагаанд Монгол Улсын Ерөнхийлөгчийн Тамгын газрын дарга А.Үйлстөгөлдөр, Ерөнхийлөгчийн Аюулгүй байдал, Батлан хамгаалах бодлогын зөвлөх хошууч генерал Д.Баасандамба, БХЯ-ны Төрийн нарийн бичгийн дарга хошууч генерал Д.Ганхуяг, ЗХЖШ-ын орлогч дарга бригадын генерал Б.Баатар, Батлан хамгаалахын сайдын зөвлөх дэслэгч генерал Г.Сайханбаяр болон БХЯ, ЗХЖШ, БХЭШХ-ийн удирдлага хамт олон, ахмад эрдэмтэд оролцлоо.
БХЭШХ-г Цэргийн гавьяаны улаан тугийн одонгоор шагнасан тухай Монгол Улсын Ерөнхийлөгчийн зарлигийг Ерөнхийлөгчийн Тамгын газрын Төрийн цэргийн болон хууль сахиулах байгууллагын асуудал хариуцсан ахлах референт хурандаа Х.Хишишгсүрэн уншиж танилцуулан Ерөнхийлөгчийн Тамгын газрын дарга А.Үйлстөгөлдөр БХЭШХ-ийн туганд хүндэтгэлтэйгээр заллаа.
БХЭШХ нь 1959 онд “Цэргийн түүхийн секц” , 1979 онд “Цэргийн эрдэм шинжилгээний институт” болон өргөжин хөгжиж улмаар 1999 оноос өнөөгийн БХЭШХ нэртэйгээр үйл ажиллагаа явуулж байна. Хүрээлэнгийн эрдэмтэн, судлаачид өнгөрсөн жилүүдэд Монголын эртний болон дундад зууны урлаг, Их Монгол Улсын цэргийн урлаг, онолын судалгааг лавшруулан судалж, ирээдүй хойч үедээ өвлүүлэн үлдээх, XX зууны Монгол цэргийн түүх, урлаг, стратеги, удирдлагын онол, сургалтын тогтолцооны үндсийг судлан боловсруулах, Батлан хамгаалахын эрх зүйн орчныг бүрдүүлэх, бодлогын үндсийг тодорхойлох, Зэвсэгт хүчний хөгжлийн бодлого, төлөвлөлтийн баримт бичгүүдийг боловсруулах чиглэлээр эрдэм шинжилгээ, судалгаа, ном, бүтээл, онол, арга зүйн санал зөвлөмжүүдийг боловсруулж Батлан хамгаалах салбарыг хөгжүүлэхэд үнэтэй хувь нэмэр оруулсан билээ.