“Ноорог” медиагийн үүсгэн байгуулагчдын нэг О.Уламсайханыг бусдыг амиа хорлох нөхцөл байдалд хүргэсэн гэх үндэслэлээр прокуророос найман жилийн хорих ялтай зүйл ангиар зүйлчилж, хэргийг 2025 оны арванхоёрдугаар сарын 26-ны өдөр шүүхэд шилжүүлсэн талаар бид өмнө нь мэдээлсэн.
Тэгвэл энэ хэргийн урьдчилсан хэлэлцүүлэг 2026.01.12-ны өдөр Баянзүрх, Сүхбаатар, Чингэлтэй дүүргийн эрүүгийн хэргийн анхан шатны тойргийн шүүхэд боллоо. Улмаар хэргийг прокурорт буцаасан байна.
Хэргийг эргэн сануулбал, 2024 оны есдүгээр сард түүний хамтран амьдрагч болох Т нь гэртээ амиа хорлосон байдалтай нас барсан байжээ. Уг хэрэгт түүний хамтран амьдрагч О.Уламсайханыг холбогдуулан шалгаж байсан бөгөөд Эрүүгийн хуулийн 10.4.1 буюу “Хүнийг амиа хорлох нөхцөл байдалд хүргэх” зүйл ангиар яллаж, хэргийг шүүхэд шилжүүлсэн байна. Эрүүгийн хэргийн 10.4.1 дэх зүйлд, “Эд хөрөнгө, албан тушаал, гэр бүлийн хамаарал бүхий харилцаа, бусад нөхцөл байдлын улмаас эрхшээлдээ байгаа хүнийг байнга хүчирхийлсэн, доромжилсон, зодсон, тамлан зовоосон, айлган сүрдүүлсний улмаас амиа хорлоход гарцаагүй хүргэсэн бол хоёр жилээс найман жил хүртэл хугацаагаар хорих ял шийтгэнэ” гэж заасан.
Бид энэ хэргийн талаар эргэж мэдээлэх болно.
А.Баярмаа
