Нэгүүн.мн сайтын эрхлэгч Л.Баяржаргалтай холбоотой асуудал олон нийтийн анхаарлыг татсаар байна. Учир нь, тэр иргэдийн дуу хоолой болж, нийгэмд болохгүй, бүтэхгүй байгааг илчилсээр ирсэн. Хэрэв түүнийг нийтэлсэн мэдээлэл, хөндсөн сэдэв, редакцийн үйл ажиллагаатай нь холбоотойгоор шалгаж, цагдан хорьсон бол энэ нь зөвхөн нэг сэтгүүлчийн асуудал биш, Монголын хэвлэлийн эрх чөлөөний асуудал юм.
Хэвлэл мэдээллийн байгууллагын үндсэн үүрэг бол эрх мэдэлтнүүдээс тайлбар нэхэх, олон нийтийн өмнөөс асуулт тавих, маргаантай асуудлыг ил гаргах. Ийм ажил хийсний төлөө редакцийн удирдлагыг эрүүгийн хэрэгт холбож, эрх чөлөөг нь хязгаарлах нь нийгэмд айдас төрүүлж, бусад сэтгүүлчдэд “болгоомжтой бай” гэсэн дохио болдог.
Л.Баяржаргалын нийтэлсэн мэдээлэлд алдаа байсан гэж хэн нэгэн үзэж байвал залруулга шаардах, шүүхээр нэр төрөө хамгаалуулах зэрэг хууль ёсны арга зам бий. Харин шууд цагдан хорих нь зайлшгүй шаардлагатай байсан уу гэдэг асуулт олон нийтийн дунд гарч байна.
Өнөөдөр Л.Баяржаргалын асуудал мэт харагдаж болох ч маргааш өөр хэвлэл мэдээллийн байгууллага, өөр сэтгүүлчийн асуудал болж хувирахыг үгүйсгэхгүй. Тиймээс энэ асуудлыг хувь хүний маргаан гэхээс илүү хэвлэлийн эрх чөлөө, үг хэлэх эрхийн хүрээнд авч үзэх нь зүйтэй.
Хэн нэгэн Нэгүүний бодлого, нийтлэлтэй санал нийлэхгүй байж болно. Гэхдээ санал зөрөлдөөнийг эрүүгийн хэрэг, цагдан хорих арга хэмжээгээр шийдэх нь ардчилсан нийгмийн зарчимд нийцэхгүй.
Тиймээс Л.Баяржаргалыг өмөөрнө гэдэг нь нэг хүнийг өмөөрч байгаа хэрэг биш. Харин сэтгүүлч асуулт тавьсны төлөө эрх чөлөөгөө алдах ёсгүй гэсэн зарчмыг хамгаалж байгаа хэрэг.
Эх сурвалж: https://erennews.mn/
